Një komision brazilian që heton mënyrën se si veproi qeveria gjatë pandemisë së Covid-19 ka votuar pro akuzave kundër Presidentit Jair Bolsonaro, ndër të tjera.
7 nga 11 senatorët e komisionevembështetën rekomandimet e përfshira në një raport prej 1,288 faqesh mbi pandeminë. Dokumenti bën thirrje për akuza kundër dy kompanive dhe 78 individëve, përfshirë presidentin Bolsonaro, për bilancin e rëndë të pandemisë në vend.
Më shumë se 605,000 njerëz kanë vdekur nga Covid-19 në Brazil – numri i dytë më i lartë i vdekjeve në botë pas Shteteve të Bashkuara.
Raporti pretendon se qeveria e Bolsonaro lejoi që koronavirusi vdekjeprurës të përhapet në të gjithë vendin në një përpjekje të dështuar për të arritur imunitetin e tufës. Ai rekomandon akuzimin personal të presidentit për 9 krime, duke përfshirë nxitjen e krimit, sharlatanizmin dhe krimet kundër njerëzimit.
Bolsonaro ka hedhur poshtë në mënyrë të përsëritur hetimin e komisionit dhe raportin rezultues si të motivuar politikisht.
Dokumenti përfundimtar i hetimeve 6-mujore do t’i dërgohet Zyrës së Prokurorit të Përgjithshëm të Brazilit. Megjithatë, ai konsiderohet aleat i presidentit dhe nuk pritet të ndiqet penalisht. Komisioni pritet gjithashtu të dërgojë një kopje të raportit në Gjykatën Penale Ndërkombëtare në Hagë.
Raportuesi i Komisionit, Senatori Renan Calheiros deklaroi se dokumenti ia atribuon përgjegjësinë për pandeminë e pakontrolluar shumë njerëzve në Brazil, por Bolsonaro mban përgjegjësinë kryesore.
“Është përgjegjësia kryesisht e këtij presidenti, këtij vrasësi serial”, tha Calheiros.
