Rasti i helmimit të ish-spiunit rus Sergei Skripal dhe vajzës së tij mund të kishte përfunduar me vdekjen e tyre. Këtë e kanë pranuar doktorët të cilët u kujdesën për kurimin e familjes që ra pre e një sulmi me agjent nervor në 4 mars, në Angli. Doktorët gjithashtu deklaruan se nuk është ende i qartë ndikimi që do të ketë helmimi për shëndetin e Skripalëve në afatgjatë.
Doktorët përgjegjës për kurimin e familjes Skripal, të cilët u helmuan në Britani, deklaruan se ata nuk prisnin që viktimat e sulmit me agjent nervor të mbijetonin.
Në një intervistë për rrjetin britanik BBC, stafi i spitalit Salisbury pranoi se rasti i helmimit të Sergei dhe Yulia Skripal ishte aq i rëndë, saqë pati dyshime nëse at e bijë do të mund t’i rezistonin ekspozimit ndaj helmit Novichok.
Sipas stafit mjekësor, nuk është e sigurt çfarë ndikimi mund të ketë episodi i helmimit në shëndetin e Skripalëve në afatgjatë. Doktorët gjithashtu deklaruan se dyshimet fillestare ishin se at e bijë kishin kaluar në mbidozë opioide, përpara se diagnoza të ndryshonte dhe kimikati helmues të identifikohej si agjenti i fuqishëm nervor Novichok.
Kujtojmë se Sergei Skripal, një ish-kolonel i inteligjencës ushtarake ruse dhe vajza e tij Yulia, u gjetën pa ndjenja në një stol publik në qytetin jugor anglez të Salisbury-t në 4 mars.
Britania fajësoi Rusinë si përgjegjëse për helmimin e Skripalëve dhe qeveritë perëndimore, përfshi edhe Shtetet e Bashkuara, përjashtuan mëse 120 diplomatë rusë.
Por Kremlini zyrtar mohoi të jetë përfshirë në incident dhe u kundërpërgjigj në të njëjtën mënyrë.
