Fatmir Musliji, i akuzuari për krim të organizuar dhe narkotikë i ka rene te fiket, pasi ka kuptuar sa është dënuar.
Fatmir Musliji i akuzuari për krim të organizuar dhe posedim, shitje e shpërndarje të substancave narkotike në vazhdimësi, nuk e ka pritur mirë dënimin që gjykata i shqiptoi.
Kur kryetarja e trupit gjykues, Suzana Çerkini, shpalli aktgjykimin me të cilin të akuzuarin Fatmir Musliji e dënoi me 10 vjet burg e 10 mijë euro gjobë, Musliji u alivanos.
Musliji u dënua me burgim dhe gjobë vetëm për shitje e posedim narkotikësh, ndërsa u lirua nga akuza për krim të organizuar.
Bashkë me Muslijin në këtë proces gjyqësor kanë qenë të akuzuar edhe Brahim Xhemajli si dhe Zijadin Gashi.
Brahim Xhemajlit gjykata i ka shqiptuar dënimin prej 4 vjet e gjashtë muajsh burgim si dhe 4 mijë euro gjobë, ndërsa Zijadin Gashit 3 vjet e tre muaj burgim, si dhe 500 euro gjobë.
Edhe Xhemajli e Gashi janë dënuar për veprën penale të blerjes, posedimit dhe shitjes së paautorizuar të narkotikëve.
Rasti i Muslijit, Xhemajlit e Gashit ishte kthyer në rigjykim nga Gjykata e Apelit.
Para kthimit në rigjykim, themelorja e kishte dënuar Fatmir Muslijin me 8 vjet burgim e 10 mijë euro gjobë, Brahim Xhemajlin 4 vjet e 6 muaj burgim dhe 4 mijë euro gjobë, ndërsa Zijadin Gashi ishte dënuar me 3 vjet e 3 muaj burgim, si dhe 2 mijë euro gjobë.
