Një ditë pasi Gjykata e Katanias liroi nga qelia të ashtuquajturin ‘financier’ të grupit të Habilajve të arrestuar për trafik droge në Itali, Nezar Seiti, mësohet se Prokuroria e Durrësit ka pushuar hetimin mbi ligjshmërinë e ekstradimit të tij drejt shtetit fqinj.
Në vendimmarrjen e prokurorisë së Durrësit të siguruar nga “News24” thuhet se çështja për ekstradimin është pushuar në fund të qershorit dhe është miratuar nga Gjykata e Durrësit.
Në arsyetimin e Prokurorisë thuhet se parregullsitë e tre institucioneve për ekstradimin, konkretisht Prokuroria, Gjykata dhe Drejtoria e marrëdhënieve Juridiksionale nuk përbëjnë vepër penale, por vetëm masë disiplinore. Një ditë më parë Gjykata e Katanias ka lehtësuar masën për Nezar Seitin nga “arrest me burg” në “arrest shtëpie”, por ende nuk është arsyetuar ky vendim. Nezar Seit u arrestua më 19 nëntor në Vlorë për llogari të autoriteteve italiane, pasi dyshohet si pjesëtar i grupit të Habilajve të akuzuar për trafik droge.
Nga përgjimet e Prokurorisë së Katanias, Seiti ka pasur rolin e financierit të grupit Habilaj dhe kujdesej për blerjen e gomoneve të shpejta. Gjithashtu sipas përgjimeve, Seiti bënte shpërndarjen e parave mes anëtarëve të bandës. Ekstradimi drejt Italisë u kërkua nga vetë Seiti pasi nëpërmjet avokatit të tij, është shprehur se nuk beson tek drejtësia shqiptare. Ekstradimi i tij drejt Italisë ngjalli mjaft debate në vend.
