Prokuroria ka nisur një procedim penal për shpërdorim detyrë për dy zyrtarë të Bashkisë Gjirokastër për pallatin 5-katësh në lagjen “Punëtori” që rrezikon të shembet dhe të lërë në qiell të hapur 15 familje.
Zyrtarët e paditur janë Vullnet Tola, përgjegjës i Inspektoratit Ndërtimor Urbanistik Vendor (INUV) dhe Aleksandër Pesha inxhinier në zyrën e bashkisë. Akuza që rëndon ndaj zyrtarëve të bashkisë është ajo e mosmbikëqyrjes së punimeve të objektit dy katësh disa metra poshtë pallatit, që u bë shkak për rrëshqitjen e dherave.
Gërmimet e bëra për ndërtimin e këtij objekti, dyshohet të jenë shkaku për çarjen e tokës dhe për rrjedhojë plasaritjen e mureve të pallatit, duke e bërë atë në gjendje të pabanueshme për shkak të rrezikut të shembjes.
15 familjet që jetojnë në këtë pallat janë sistemuar te të afërmit e tyre dhe në hotele, ndërsa zona ku ka rrëshqitje dheu është rrethuar si pikë rreziku. Familjet e këtij pallati rrezikojnë të mbeten të pastrehë, ndërkohë që mbeten në pritje të raportit të Institutit të Gjeologjisë se çfarë do të bëhet me tokën që rrëshqet vazhdimisht.
