Nuk dihet ende saktë se kush është ndikimi që kanë pijet energjike në disa aspekte të jetës sonë, si shëndeti apo jeta seksuale.
Gjithsesi, një gjimnaz në Vermont të Shteteve të Bashkuara të Amerikës ka njoftuar së fundmi se do të ndalohet shitja e tyre në kampuset e tij, pasi këto pije lidhen me “sjellje problematike”. Për çfarë lloj sjelljeje bëhet fjalë?
“Rrezik i lartë për aktivitet seksual” dhe “rritje e përdorimit të substancave narkotike”.
Kolegji Middlebury, një institucion 216-vjeçar, ka varur në ambientet e mencave të tij një njoftim ku shkruhet se që nga data 7 mars, në kampuse nuk do të shitet asnjë lloj pijeje energjike.
“Konsumi i pijeve energjike lehtëson zakone të pashëndetshme si pagjumësia, stresi dhe heqje përqëndrimi nga studimet”, lexohet gjithashtu në njoftim, që vazhdon më tej duke përmendur studime shkencore që lidhin pijet energjike me “rrezikun e lartë të pjesëmarrjes në aktivitete seksuale”.
Kjo masë është marrë pasi një person që punonte në mensë, Myles Kamisher-Koch, e kishte shtruar si problem këtë gjë në një mbledhje në mes të muajit janar. Ai kishte prezantuar fakte shkencore kundër pijeve energjike, duke thënë se ato promovonin “trende të këqia akademike”.
Ka studentë që janë dakord me këtë masë, pasi thonë se “pijet energjike lidhen me rrezikun e lartë seksual dhe përdorimin e drogave, por ka edhe nga ata të cilëve kjo masë i duket e ekzagjeruar: “Ka shumë gjëra të tjera më të rëndësishme që duhen rregulluar në gjimnaz. Çfarë lidhje ka pija energjike me seksin”.
Por vetë drejtuesit e gjimnazit thonë se nuk i kanë ndaluar studentët të konsumojnë pije energjike, thjesht i kanë ndaluar ata t’i blejnë në ambientet e gjimnazit.
“Nuk po ndalojmë asgjë. Thjesht kemi marrë vendimin që të mos shesim më këto produkte në dyqanet tona. Studentët apo stafi pedagogjik janë të lirë të konsumojnë këto pije nëse kanë dëshirë dhe në qytetin tonë ka plot vende ku mund të blihen. Thjesht, ne nuk duam të inkurajojmë konsumimin e tyre”, tha Stephen Diehl, kryeredaktori i gazetës së gjimnazit.
