GJERMANI/ Klima e integrimit të migrantëve gjithnjë e më e mirë

15 December, 2022 s.autor Botë, Nderkombetare

As fluksi i ri i refugjatëve nga Ukraina, e as kriza ekonomike e shkaktuar nga pandemia nuk e ka dëmtuar klimën integruese të migrantëve në Gjermani. Përkundrazi: Barometri i integrimit, që u prezantua të mërkurën nga Këshilli i Ekspertëve të Integrimit (SVR) në Berlin, flet për një trend të qartë: “Klima e integrimit në Gjermani po rezulton të jashtëzakonisht e qëndrueshme,” tha kryetarja e SVR Prof. Petra Bendel gjatë prezantimit të Barometrit të Integrimit të mërkurën në Berlin.

Barometri i Integrimit është një studim që Këshilli i Ekspertëve të Migracionit, kryesisht profesorë dhe shkencëtarë nga disiplina të ndryshme, bëjnë së bashku për të parë se sa dhe si e pranon Gjermania migracionin. Ata pyesin çdo dy vjet rreth 15 000 qytetarë mbi 15-vjeçarë që përfaqësojnë katër grupe: gjermanët pa sfond migracioni, qytetarë me sfond migracioni, gjermanë të riatdhesuar dhe qytetarë me prejardhje turke. Pyetjet e anketimit synojnë të kuptojnë se e perceptojnë këto grupe integrimin e imigrantëve në fusha të ndryshme: konkretisht, në jetën e përditshme, në profesion, arsim dhe politikë. Treguesi përmbledhës që jep një përshtypje të parë të përgjithshme është Indeksi i Klimës së Integrimit (IKI). Sa më i lartë ky, aq më e mirë është klima e integrimit të imigrantëve në Gjermani. Për periudhën e hulumtimit nga nëntori 2021 – korrik 2022, indeksi i përllogaritur nga ekspertët është 68.5, pra, më i lartë se indeksi i vitit 2020 (66.3).

Ekspertët thanë se klima e integrimit perceptohet ndryshe në varësi të disa tipareve sociale, si mosha, gjinia dhe niveli arsimor: “Të rinjtë, gratë dhe të diplomuarit në shkolla të larta e vlerësojnë më pozitivisht klimën e integrimit sesa të moshuarit, burrat dhe personat me arsim të ulët”, tha Profesor Marc Helbling, nga Qendra Shkencore për Hulumtime Sociologjike (WZB) në Berlin.