Deputetja e Kosovës, Adriana Matoshi, ka zbuluar ditën e djeshme se është kërcënuar. Aktorja ka treguar se shkak është bërë angazhimi i saj në mbrojtje të të drejtave të grave.
Në një postim në rrjete sociale, Matoshi shkruan se është angazhuar që t’u vijë në ndihmë grave, të cilat për vite me radhë janë dhunuar fizikisht dhe psikologjikisht nga bashkëshortët e tyre.
“Ditëve të fundit jam bërë cak i kërcënimeve të ndryshme për shkak të angazhimit tim në mbrojtje të drejtave të grave, sidomos ndihmës që po ju jap grave, të cilat me vite kanë pësuar dhunë psiqike e fizike nga burrat e tyre.
Gabon rëndë ai që mendon që më frikëson, sepse hyrja ime në politikë dhe parlament ka një mision, i cili nuk do të pushojë para se çdo nënë, motër e grua, ta fitojë lirinë dhe të drejtën e vet elementare njerëzore për të jetuar e lirë dhe e pa cënuar nga askush”,- shkroi Adriana në statusin që publikoi në llogarinë e saj në Instagram.
Nga ana tjetër, aktorja po shijon prej më shumë se një viti lidhjen me futbollistin afrikan, Keith Groeneveld, i cili është 19 vite më i vogël se ajo. Matoshi ka vazhduar historinë e saj të dashurisë pavarësisht paragjykimeve të njerëzve, të cilët nuk ngurojnë ta ofendojnë edhe në rrjete sociale.