Kryebashkiaku i Tiranës, Erion Veliaj ka akuzuar Federatën Shqiptare të Futbollit se prej 20 vitesh nuk ka bërë asgjë për sportin.
Në një takim me përfaqësuesit ligjorë të Shoqatave Sportive të Tiranës, Veliaj shprehet se FSHF është kthyer në një agjenci “sigurimsash” dhe që nuk kanë asnjë lidhje me futbollin.
Kryebashkiaku i Tiranës i është drejtuar dhe institucioneve ligjzbatuese në vend, duke u shprehur se janë 20 vite me vonesë dhe nuk kanë vepruar ndaj FSHF-së.
“Asambleja e sotme ka për qëllim të vazhdojë punimet me një shumicë të qartë të anëtarësisë, të atyre që bëjnë punët dhe jo të atyre që na i delegojnë si votuesit tanë. Fatet tona do i marrin në dorë vetë, votimet do t’i bëjmë vetë, duke qenë se kemi një kuorum të atyre që merren me këtë punë. Këtë fushatë do e çojmë deri në fund për të vendosur drejtësi për ata që nuk e shohin këtë si treg skllevërish. Shiten dhe blihen interesat dhe idealet e atyre që bëjnë punën me djersë. Do e çojmë deri në fund, nuk do lëmë gur të organeve të drejtësisë, ky nuk është kërcënim por premtim. Kam pasur disa beteja të tjera. Di tju them se kur e drejta bëhet bashkë me të drejtët, nuk ka klan mafioz që na ndalon.
Sot për të gjithë ata që ulërasin për përfshirjen e politikës, këtu jam si aksioner. Nuk mund të ecë përpara çdo fushë dhe kjo të jetë një gropë e zezë. Kjo asamble thirret nga ata që kanë emrat në gjykatë. Dua në finale tju ftoj që kështu të bashkuar siç jemi sot, teksa po kthehet vëmendja në shpartallimin e kësaj bande mafioze. Këta kanë problem kur dikush thotë të vërtetën. Vetë për të shpifur e bëjnë përditë këta. Institucionet janë të vonuara, 20 vjet me vonesë. Unë erdha në 2002 kur Duka e mori mandatin për herë të parë. Ndërrova 6 punë, më dolën thinjat dhe ky do mandatin e gjashtë. E gjithë FSHF është kthyer në një agjenci sigurimsash dhe jo si do lozin futboll. Sot është vetëm fillimi, ne do marrim vendimet sot. Do ja paraqesim vendimet gjykatë” – tha Veliaj.
