Për herë të parë në historinë e mjekësisë botërore, është shpëtuar jeta e një personi të djegur në 95 për qind të trupit.
Kjo është arritur falë lëkurës së marrë nga vëllai i tij binjak, bëri të ditur spitali Saint-Louis në Paris, ku është kryer operacioni në fjalë.
Ky është rasti i parë që është transplantuar lëkura e vëllezërve binjakë në një sipërfaqe kaq të madhe të trupit, thuhet në njoftimin e spitalit.
Pacienti Franck, i cili tashmë është kthyer në shtëpi ku po rikuperohet, pësoi një aksident në punë në shtator të vitit 2016, ndërkohë që mjekët fillimisht kishin thënë se gjasat për të mbijetuar ishin pothuajse të pashpresa.
Operacioni i parë i transplantit ishte shtatë ditë pas lëndimit, hera e dytë 11 ditë më pas, dhe intervenimi i tretë ishte 44 ditë pas djegies.
“Gjithmonë kemi qenë të afërt, por tani jemi akoma më shumë”, tha Frank për transmetuesin televiziv BFMTV.