Fondi Monetar Ndërkombëtar deklaron se qeveria ka rritur borxhin publik edhe pas shlyerjes së detyrimeve të prapambetura. Në raportin e fundit mbi Shqipërinë, FMN vëren se në fund të këtij viti borxhi publik i Shqipërisë do të jetë 71.5 për qind ose 1.1 për qind më i lartë se sa në fund të 2013-ës.
Kjo do të thotë se në 5 vjet qeveria jo vetëm që nuk e ka ulur borxhin me asnjë pikë përqindje, por përkundrazi e ka rritur atë. Nëse krahasohet me vitin 2012 atëherë qeveria e ka rritur borxhin publik me 7.5 pikë përqindje.
Kjo në një kohë kur qeveria ka rritur ndjeshëm taksat dhe ka ngrirë rrogat dhe pensionet. Pra qytetarët paguajnë më shumë taksa, marrin rroga dhe pensione më të ulëta, por ndërkohë borxhi rritet.
***
Në fund të vitit 2012, borxhi publik i Shqipërisë ishte 64 për qind e Prodhimit Kombëtar. Por pas rrotacionit politik në vitin 2013, qeveria e re e rriti borxhin duke përfshirë në të edhe shifrën e detyrimeve të prapambetura. Si rezultat në vitin 2013 borxhi kërceu në 70.5 për qind.
Përgjatë gjithë këtyre viteve qeveria është mbrojtur se rritja e borxhit ishte e detyrueshme për shkak të detyrimeve të prapambetura që kishte lënë qeveria e demokratëve. Por edhe pas shlyerjes së tyre, qeveria ka vazhduar ta rrisë borxhin.
Tre vitet e shkuara qeveria ishte në një program me Fondin Monetar Ndërkombëtar. Por edhe marrëveshja me FMN nuk e uli borxhin, përkundrazi e rriti atë.
Por shifra zyrtare e borxhit nuk i përfshin gjithë detyrimet e qeverisë, pasi në të nuk janë regjistruar koncesionet. Sipas FMN, nëse do të përfshihen edhe detyrimet që rrjedhin nga kontratat koncesionare atëherë borxhi i Shqipërisë është rreth nivelit 80 për qind.
FMN i ka kërkuar qeverisë të regjistrojë koncesionet si borxh sipas standardeve ndërkombëtare. Por deri tani kjo kërkesë është refuzuar në mënyrë kategorike nga qeveria, edhe pse kontratat koncesionare kanë arritur në rreth 540 miliardë lekë ose gati 45 për qind e Prodhimit Kombëtar.
Një pjesë e madhe e tyre paguhen nga buxheti i shtetit, rrjedhimisht janë detyrim drejtëprdrejt i qeverisë edhe pse nuk përfshihen në shifrën zyrtare të borxhit.
