Nga aksidenti i ndodhur i ndodhur pasditen e së enjtes në Tiranë, mbetën të plagosur edhe 3 persona. Ata ishin anëtarë të një familjeje, që po udhëtonin në autostradën Tiranë-Elbasan kur nga lart i erdhi Audi që drejtohej nga 20-vjeçari Klevis Ruçaj. Nga ngjarja ata mbetën të plagosur, fatmirësisht pa rrezik për jetën.
Të gjendur në vendin dhe momentin e gabuar, ata dyshohet se udhëtonin me shpejtësi të reduktuar. I këtij mendimi është edhe eksperti i sigurisë rrugore, Gëzim Hoxha.
Eksperti tha se nëse makina Hyundai do të kishte qenë me shpejtësi, e gjithë kabina do të ishte shtypur nga Audi që erdhi nga lart, duke sjellë një tragjedi edhe më të madhe.
“Nëse do të kishin qenë me shpejtësi të madhe lëvizja e saj para do t’i shtypte të gjithë kabinën dhe do t’i vriste të gjithë ata njerëz. Por siç duket ka qenë me shpejtësi të reduktuar.
Sepse dhe vetë drejtuesi i mjetit është një grupmoshë tjetër, 61 vjeç më duket se është. Ka studime bota. Mbi moshën 55-vjeç rritet kujdesi, ulet shpejtësia. Siç duhet shoferi ka qenë i kujdesshëm, ka qenë me familjen. Fati i tyre i mirë, i urojmë shërim të shpejtë”, tha Hoxha.
Kujtojmë se nga ngjarja e djeshme humbën jetën 3 të rinjtë Klevis Ruçaj, Erisilda Abedini dhe Sikela Përroj. Shkak për ngjarjen dyshohet se u bë shpejtësia tej normave të lejuara. 20-vjeçari Ruçaj humbi kontrollin e mjetit, duke çarë barrierat metalike dhe duke përfunduar poshtë, në nënkalim.
