Ish-kreu i Shërbimit Informativ të Shtetit, Fatos Klosi, thotë se krimi është armiku i përbashkët i vendeve që lagen nga Adriatiku.
Në një intervistë për gazetën “Shekulli”, Klosi thotë se situata është e tillë që më e ndershme do të ishte legalizimi i kanabisit dhe nga ky aktivitet të përfitojnë të gjithë, e jo t’i lihet në dorë trafikantëve.
“Unë jam për legalizimin. Me këto situata që u krijuan, të paktën këtë vit, është më e ndershme të legalizohet. Situata është kjo që pretendohet kanabizim të vendit. Po kritikohemi nga të gjithë aleatët. Thuhet që po fitojnë ata që organizojnë këtë aktivitet, pra trafikantët dhe fshatarët kanë ngelur pa para. Në këtë situatë më mirë ta mbjellin fshatarët vetë dhe të fitojnë të gjithë. Megjithatë, nëse do të mbillet legalisht do të bjerë çmimi dhe nuk do të jetë ndonjë përfitim i madh, por do jetë si produktet e tjera që prodhohen në vend. Holanda e prodhon, disa shtete të SHBA-së e kanë legalizuar. Megjithatë, organet e prokurorisë duhet t’i shkojnë deri në fund kësaj problematike, sepse është vepër penale, është krim. Këtë vit është bërë një zhurmë e madhe dhe fakti është që këtë vit shtetit i doli situata nga duart”, thotë Klosi.
