Kuvendi i Shqipërisë i ka dërguar Presidentit Ilir Meta draftin me ndryshimet kushtetuese të miratuar në seancën e 30 korrikut për të cilat presidenti është shprehur se nuk i njeh. Por kreu i shtetit duket i pashpresë në përpjekjet e tij të fundit për të mos pranuar ndryshimet që u miratuan në seancën e fundit plenare në Kuvend. Vetë Kushtetuta, të cilën Meta ka thënë se do ta mbrojë nga ndryshimet e njëanshme e ndalojnë atë të kthejë për rishqyrtim.
Burime nga institucioni i presidencës, bëjnë me dije për Euronews Albania se kreu i shtetit nuk do ta ushtrojë të drejtën e tij për të dekretuar një ligj. Duke qenë se në kushtetutë është një klauzolë që nuk e lejon kthimin për rishqyrtim të ndryshimeve të aktit themeltar të shtetit, atëherë Meta ka zgjedhur që ta kalojë atë në heshtje.
