Për televizionin Klan, Silvana Bala tha se vetëm tek Shefqet Ndroqi janë 210 të shtruar, që shfaqin probleme pneumologjike dhe sipas pamjeve imazherike kanë virusin Covid në mushkëri.
Nga tamponi, shumica e pacientëve rezultojnë negativë, por këta pacientë e kanë virusin në mushkëri tha mjekja, ndërsa pranon problemet e tyre me frymëmarrjen.
“Është një situatë e rënduar. Unë kam këtu rreth 210 të shtruar. Vështirësia në frymëmarrje që është simptoma kryesor i këtyre rasteve, 2/3 e tyre dalin me tampon negativ sepse e kanë kaluar stadin e parë në shtëpi”, ka thënë mjekja.
Silvana Bala sqaron se virusi është vendosur thellë në rrugët e frymëmarrjes dhe nuk kapet nga tamponi.
“Covid me test nazofaringial del në ditët e para. Kur infeksioni zbret poshtë testi që merret në rrugët e sipërme respiratore rezulton negativ, ama pjesët e poshtme janë prekur. Është vendosur pneumonia” thotë mjekja.
Pra me sa duket, në raportimet e ministrisë flitet për raste të reja “të konfirmuara”, pra vetëm ato pacientë që rezultojnë pozitivë përmes testit të tamponit dhe jo për gjendjen reale të situatës në spital, e cila duket të jetë tepër e rëndë.
Dje ministria bëri me dije se në të dy spitalet Covid, përveç pacientëve të konfirmuar pozitivë me COVID-19, po vijojnë të marrin trajtim edhe pacientë të dyshuar, të cilët po trajtohen sipas protokolleve përkatëse. Janë pikërisht këta pacientë që me sa duket nuk llogariten te shifrat zyrtare.
