Kryeministri izraelit Benjamin Netanyahu u detyrua të mohonte publikisht teoritë e konspiracionit që e lidhin Izraelin me vrasjen e komentatorit konservator Charlie Kirk.
Kirk u qëllua për vdekje më 10 shtator në Universitetin e Utah-ut nga 22-vjeçari Tyler Robinson, i cili është arrestuar dhe po përgatitet të përballet me dënimin me vdekje.
Që nga dita e vrasjes së tij, kërkimi për motivet e autorit të krimit ka nxitur një sërë akuzash dhe rrëfimesh konspiracioni. Spekulime të pabaza po qarkullojnë në internet që implikojnë Mossadin apo edhe mbështetësit fanatikë të Trump, thekson Independent.
Në një mesazh video në X, Netanyahu i quajti akuzat një “gënjeshtër të madhe dhe monstruoze”. “Joseph Goebbels tha se sa më e madhe të jetë gënjeshtra, aq më shpejt përhapet. Disa njerëz kanë sajuar një gënjeshtër kaq monstruoze, saqë Izraeli ka të bëjë me vrasjen e tmerrshme të Charlie Kirk. Kjo është çmenduri, e rreme dhe skandaloze”, tha ai.
Kryeministri izraelit theksoi se Kirk ishte “një gjigant, një talent që ndodh vetëm një herë në një shekull” dhe theksoi miqësinë që ai shprehte ndaj Izraelit dhe anasjelltas. “Ai më kishte shkruar vetëm pak muaj më parë një letër plot dashuri për popullin hebre dhe kulturën tonë të përbashkët judeo-kristiane”, tha ai.
Episodi vjen në një kohë kur Izraeli po përballet me kritika në rritje ndërkombëtare dhe vendase për shkak të operacioneve të tij ushtarake në Gaza. Përhapja e teorive konspirative rreth vdekjes së Kirkut duket se nxitet nga kjo klimë mosbesimi.
Pavarësisht thashethemeve, Netanyahu këmbënguli se marrëdhënia e tij me Kirk ishte e ngushtë. Në një postim pas vrasjes, ai e quajti Kirk një “mik të Izraelit me zemër luani” dhe zbuloi se kishte folur me të vetëm dy javë më parë, duke e ftuar të vizitonte vendin. “Fatkeqësisht, kjo vizitë nuk do të zhvillohet. Kemi humbur një njeri të jashtëzakonshëm”, përfundoi ai.
