Endri Hasa është zgjedhur deputet si shpërblim për mbulimin e vrasjeve të ndodhura në 21 janar 2011, gjatë protestës së ish-opozitës së kohës, sot maxhorancë, ku mbetën të vrarë katër qytetarë në bulevardin Dëshmorët e Kombit.
Akuzën e ka bërë kryetari i komisionit të ligjeve Ulsi Manja, i cili nëpërmjet një statusi në rrjetet sociale edhe pse thotë se nuk do të donte të shkruante për kolegët deputetë, e bëri këtë pas goditjes që deputeti në fjalë i bëri kryeministrit Edi Rama në foltoren e kuvendit.
Endri Hasa, deputeti që qëlloi sot në seancën plenare kryeministrin Edi Rama, është akuzuar për fshirjen e serverit të kryeministrisë, e pikërisht momenteve kur nga garda e Republikës qëllohej me armë zjarri ndaj protestuesve.
Fshirja e të dhënave të serverit të kryeministrisë, u konsiderua krim nga opozita e kohës, por ndërkohë, njeriu përgjegjës, është sot i zgjedhur deputet i Partisë Demokratike nga qyteti i Elbasanit.
Shkruan Ulsi Manja në Facebook:
Normalisht nuk shkruaj dhe nuk komentoj kurrë kolegët e mi deputetë. Por kur një person është zgjedhur deputet, si shpërblim për mbulumin e vrasjeve të ndodhura në 21 janar, në rolin e autorit të fshehjes së provave vendimtare për dënimin e autorëve të këtyre vrasjeve shtetërore politike, të protestojë në emër të lirisë studentore apo të mbrojë interesat e studentëve, ky është turpi i opozitës dhe i çdo njeriu të lirë në këtë vend. Studentë, kjo që ndodhi sot në Kuvend është një arsye më shumë që ti ktheheni dialogut dhe të zgjidhni hallin tuaj, dhe mos lejoni që kauzën tuaj ta përfaqësojë opozita e Endri Hasës me shokë! UM
