Një shtetas shqiptar është dënuar me 10 vite burg në Mbretërinë e Bashkuar, pasi u shpall fajtor për përfshirje në kontrabandë emigrantësh dhe posedim droge me qëllim shpërndarjen.
Bëhet fjalë për Ibrahim Sollakun, 33 vjeç, i cili pranoi se kishte bashkëpunuar me persona të tjerë për të transportuar ilegalisht pesë emigrantë shqiptarë nga Belgjika drejt Mbretërisë së Bashkuar, në nëntor të vitit të kaluar. Sipas autoriteteve, emigrantët kishin mbërritur fillimisht në Evropë nga Shqipëria.
Hetimet tregojnë se Sollaku kishte organizuar transportin e tyre drejt një porti belg përmes një shoferi taksie, ku më pas do të futeshin në një kamion për kalimin e Kanalit. Pas mbërritjes në Mbretërinë e Bashkuar, ata do të merreshin nga një shofer tjetër dhe do të shpërndaheshin në komunitet.
Më 5 nëntor, policia belge arrestoi shoferin e taksisë dhe pesë emigrantët në qytetin Bruges, ndërsa Sollaku u ndalua po atë ditë në Mbretërinë e Bashkuar nga oficerët e Njësisë Rajonale të Krimit të Organizuar Jugperëndimor.
Gjatë kontrollit të banesës së tij, policia gjeti 105 gram kokainë të mbështjellë me film plastik, si dhe 36 gram të tjera të ndara në 94 tuba plastikë. Po ashtu, u sekuestruan shënime të shkruara me dorë dhe shuma parash, të cilat dyshohet se lidhen me aktivitetin e shpërndarjes së drogës.
Në seancën gjyqësore të zhvilluar në dhjetor, Sollaku pranoi fajësinë për posedim të drogës së klasit A me qëllim furnizimin. Sot, Gjykata e Kurorës në Winchester e dënoi atë me gjithsej 10 vite burg.
Anja Hohmeyer nga Shërbimi i Prokurorisë së Kurorës deklaroi se Sollaku kishte një rol drejtues në këtë skemë kriminale dhe theksoi se operacioni ishte rezultat i bashkëpunimit të suksesshëm mes autoriteteve britanike dhe atyre belge për të goditur kontrabandën ndërkufitare të njerëzve.
Ndërkohë, DCI Adam Smith nga Njësia Rajonale e Krimit të Organizuar Jugperëndimor u shpreh se Sollaku ishte një kriminel i mirëorganizuar, i përfshirë si në kontrabandë emigrantësh ashtu edhe në trafikun e drogës së fortë, duke vepruar vetëm për përfitime financiare dhe pa u shqetësuar për pasojat ndaj individëve dhe komuniteteve.
Autoritetet britanike nënvizojnë se hetimet për rrjetet e kontrabandës vijojnë dhe se çdo informacion mund të ndihmojë në goditjen e grupeve kriminale që përfitojnë nga emigracioni i paligjshëm.
