Një 49-vjeçar, banues në Belsh, ka rënë në prangat e Policisë, pasi dyshohet se vodhi një automjet.
Përmes një njoftimi, Policia bën të ditur se shtetasi që bëri kallëzim në Komisariat, e kishte marrë makinën me qira.
Policia ka gjetur automjetin e vjedhur, ndërkohë që materialet proceduriale i kaluan Prokurorisë për veprime të mëtejshme.
Njoftimi i Policisë:
Cërrik-Si rezultat i veprimeve të shpejta të kryera pas kallëzimit për vjedhjen e një automjeti, Policia identifikon, kap dhe vë në pranga autorin e dyshuar të vjedhjes dhe gjen automjetin e vjedhur.
Specialistët për Hetimin e Krimeve të Komisariatit të Policisë Cërrik, menjëherë pas kallëzimit të një shtetasi, se në Belsh, i kishin vjedhur automjetin që ai e kishte marrë me qira, organizuan punën për identifikimin dhe kapjen e autorit.
Si rezultat i veprimeve të shpejta hetimore dhe operacionale të kryera nga specialistët për Hetimin e Krimeve të Komisariatit të Policisë Cërrik, u bë i mundur identifikimi, kapja dhe arrestimi i autorit të dyshuar të vjedhjes së automjetit, shtetasit L. D., 49 vjeç, banues në Belsh.
Materialet procedurale iu referuan Prokurorisë së Elbasanit, për veprën penale “Vjedhja”.
