Policia e Tiranës dhe Prokuroria kanë sekuestruar pasuri me vlerë 200 mijë euo, në pronësi të 2 shtetasve të dënuar për trafikim të lëndëve narkotike. Në kuadër të operacionit “Burimi” u sekuestruan 1 apartament në Selitë dhe 1 garazh në Selitë të Vogël. Pasuritë në fjalë që dyshohet se kanë ardhur si rezultat i burimeve kriminale, rezultojnë në pronësi të dy shtetasve të dënuar, njëri Gjino(Shkelqim) Lleshaj në Ital dhe tjetri Pajtim Braçaj në Shqipëri .
Njoftimi:
Tiranë/Finalizohet operacioni i koduar “Burimi”.
Sekuestrohen pasuri me vlerë 200 000 euro, në pronësi të 2 shtetasve të dënuar për trafikim të lëndëve narkotike.
Në vijim të hetimeve intensive, të kryera nga Seksioni për Hetimin e Pastrimit të Parave dhe Aseteve Kriminale në Drejtorinë Vendore të Policisë Tiranë dhe Prokuroria e Tiranës, me objektiv gjurmimin dhe sekuestrimin e pasurive/pronave, produkte të veprimtarive kriminale brenda dhe jashtë vendit, u finalizua operacioni i koduar “Burimi”.
Në kuadër të këtij operacioni u ekzekutua vendimi i Gjykatës së Tiranës, për vënien e sekuestros preventive mbi 1 apartament në Selitë dhe 1 garazh në Selitë të Vogël, me vlerë totale rreth 200 000 euro, në pronësi përkatësisht të shtetasit P. B., 63 vjeç, i dënuar në Shqipëri për trafikim të lëndëve narkotike, dhe të shtetasit Gj. Ll. alias Sh. Ll., 44 vjeç i dënuar në Itali, për trafikim të lëndëve narkotike.
Hetimi për gjurmimin dhe sekuestrimin e aseteve të tjera, me burime kriminale, në pronësi të këtyre shtetasve dhe shtetasve të lidhur me ta, vijon.
