Vijon në Gjykatën e Posaçme AntiKorrupsion (GJKKO) dëshmia e të penduarit të drejtësisë, Henrik Hoxhaj, në kuadër të procesit gjyqësor për dosjen e bujshme “Plumbi i Artë”.
Hoxhaj ka zbardhur sot, 10 shkurt, detaje mbi atentatin e planifikuar ndaj biznesmenit (pronar i një shkolle private) Lulzim Masha, duke deklaruar se porosia fillestare nga Nuredin Dumani ishte për djalin e tij, por për shkak se ai ndodhej në Maqedoni dhe nuk u gjet, plani u zhvendos te i ati.
Sipas Hoxhajt, fillimisht u diskutua pagesa prej 150 mijë eurosh, ndërsa më pas 100 mijë euro për ekzekutimin e Mashës.
“Në fillim diskutuam për 150 mijë euro. Pastaj për Lulzim Mashën për 100 mijë euro”, ka treguar ai.
Ai tregoi se mbikëqyrja e objektivit zgjati rreth 1 vit dhe se për atentatin u përdor një automjet “Golf 4”, për të mos rënë në sy.
“Mbikëqyrja e Lulzimit zgjati gati 1 vit, sepse e lamë pak pas dore. Djalin nuk po e gjenim dot. Prandaj u angazhua ‘Sakati’, i cili do të na jepte informacion nëse ai futej në Shqipëri. Nuredini thoshte se djali i Mashës mashtronte njerëzit në Maqedoni. Ne e pritëm, por nuk erdhi. Pastaj morëm masa që të vrisnim të atin, në mënyrë që djali të vinte në varrim dhe ta vrisnim”, mësohet se ka rrëfyer ai, raporton gazetarja e Klan News, Glidona Daci.
Hoxhaj deklaroi se përdori një person në një lokal në Tiranë për të marrë informacion mbi lëvizjet e Mashës, ndërsa atentati u krye nga Skerdi Tasi, i cili e qëlloi dy herë, por arma e zjarrit u bllokua.
Ai shtoi se kishte radio policie dhe dëgjonte në kohë reale komunikimet e efektivëve, të cilët po përshkruanin autorin sipas tipareve të bashkëpunëtorit të tij.
Atentati ndodhi më 18 janar 2022, te Liqeni i Thatë, teksa Masha po lëvizte me makinë.
