Një aksident automobilistik është regjistruar pasditen e sotme në aksin rrugor Fier–Berat, pranë fshatit Velmish.
Sipas informacioneve paraprake, një automjet tip “Benz”, me drejtues shtetasin Josif Shkëmbin, është përplasur me një mjet bujqësor tip “Zetor”. Si pasojë e përplasjes, drejtuesi i mjetit bujqësor, shtetasi Ani Hazizi, ka mbetur i lënduar.
I plagosuri është transportuar me urgjencë drejt Qendrës Shëndetësore të Roskovecit për të marrë ndihmën e parë mjekësore. Burime mjekësore bëjnë me dije se ai ndodhet jashtë rrezikut për jetën.
Në vendngjarje kanë mbërritur shërbimet e Policisë dhe grupi hetimor, të cilët po punojnë për zbardhjen e shkaqeve të aksidentit, si dhe për normalizimin e qarkullimit të mjeteve.
Aksi Fier–Berat njihet si një prej segmenteve problematike të qarkullimit rrugor, i konsideruar shpesh si “njollë e zezë” për shkak të numrit të lartë të aksidenteve, disa prej të cilave kanë përfunduar me pasoja fatale.
