Kryetari i Partisë Demokratike, Sali Berisha thotë se kryeministri Edi Rama po e shndërron çështjen e shqiptarëve që largohen në Britani në luftë të brendshme për të fituar pikë politike.
Në një konferencë, ish-kryeministri akuzoi kryeministrin Rama dhe vëllain e tij, Olsi Rama se janë personalisht të lidhur me krimin dhe drogën.
Sipas Berishës, Rama po ndërhyn në politikën e brendshme britanike për llogari të këshilltarëve të tij.
“Autor kryesor i kësaj drame theksoj edhe njëherë është Edi Rama, arkitekt kryesor i kësaj drame njerëzore është Edi Rama. Janë lidhjet e tij të tmerrshme me korrupsionin, janë vjedhjet e tij në afera qindra dhe qindra milionëshe, janë rrëmbimi i votës, çka bën që këta qytetarë të pashpresë në vendin e tyre. Janë lidhjet me krimin dhe drogën, personalisht të Edi Ramës, Olsi Ramëd dhe qeveritarëve të tjerë.
Rama këto ditë është angazhuar në një betejë politike të brendshme në jetën e Britanisë së Madhe. I këshilluar nga këshilltarë që duan ta shndërrojnë çështjen e shqiptarëve në luftë të brendshme për pikë politike, Edi Rama kalon nga një konferencë në tjetrën duke përdorur gjuhën e një njeriu më ordiner. Gjuhë të cilën tregon se ai tregon se nuk ka minimumin e edukatës familjare. Gjuhë që bazohet në urrejtje dhe për interesa të tij është gati të përdore çdo fjalë. Kjo që po ndodh me shqiptarët është kryekëput vepër e Ramës”, tha Berisha.
