Gjykata e Shkodrës ka caktuar sot masën e sigurisë “arrest me burg” për shtetasin Mark Kodra, i akuzuar si autori i vrasjes së 25-vjeçarit Emiljano Ndou, në fshatin Bardhaj.
47-vjeçari ka deklaruar në gjykatë se “ajo punë ka ndodhur, çfarë është bërë, është bere”, ndërsa nuk ka dhënë sqarime të mëtejshme.
Gjykata cilësoi si të ligjshëm arrestimin dhe vendosi “arrest me burg” për Mark Kodrën.
Ndërkohë, në deklarimet e dhëna në polici shtetasi, Mark Kodra ka pranuar se është ai autori i vrasjes dhe ka sqaruar se konflikti ka nisur para një viti dhe më pas është përshkallëzuar, derisa viktima, sipas autorit, i ka rrahur djalin këtij të fundit, edhe pse e kishin lajmëruar disa herë që të bënte kujdes.
