50 vjeçari Ahmet Toska u vra mëngjesin e sotëm në Fier, në vendin e quajtur “Sheq i Madh” nga një person i maskuar, i cili e qëlloi vetëm njëherë në kokë duke i marrë jetën dhe duke e lënë të vdekur në vend.
Toska u vra në derën e shtëpisë, sapo doli bashkë me bashkëshorten e tij dhe po shkonin në punë. Gruaja e tij, e cila pa gjithë ngjarjen, ka thënë në Polici se autori ishte i maskuar dhe pasi qëlloi u largua me vrap.
“Ishim duke shkuar në punë. Personi ishte me maskë”, i ka thënë ajo hetuesve.
Rreth 12 kamera sigurie janë sekuestruar nga Policia, të cilat mbulojnë gjithë zonën ku u vra Ahmet Toska dhe rrugën që ka ndjekur autori. Vrasja ka ndodhur mëngjesin e sotëm, në orën 06.00, ndërsa shkaku i ngjarjes së rëndë që ka tronditur Fierin nuk dihet ende.
Bashkëshortja e viktimës ka thënë se ka kërkuar ndihmë nga fqinjët pas vrasjes së burrit, por ishte shumë vonë pasi ai ndërroi jetë në vend. “E qëlloi në kokë dhe u largua me vrap. Kërkova ndihme nga fqinjët por ishte shume vonë”, ka thënë ajo.
