Detaje të reja janë zbuluar nga ekzekutimi i 46-vjeçarit, Bardhok Pllanaj në Shkodër. Klan News raporton se drejt Planajt është qëlluar mbi 30 herë me kallashnikov.
Shumica e plumbave kanë kapur makinën me të cilën ai po udhëtonte, por 2 plumba besohet se kanë qenë fatal. Një plumb e ka kapur në zemër dhe një tjetër në kokë, çka i kanë shkaktuar dhe vdekjen në vendngjarje.
Në momentin kur është qëlluar me armë, Pllanaj ishte në lëvizje me makinën e tij, rreth orës 21:30 të së dielës. Mendohet se makina e vrasësve ka lëvizur paralelisht me mjetin e viktimës, duke qëlluar për rreth 500 metra me breshëri derisa e kanë lënë të vdekur.
Pllanaj është përmendur më parë në media në disa ngjarje kriminale dhe ka qenë i arrestuar nga policia. Në Dhjetor të vitit të kaluar, Pllanaj sulmoi me armë një lokal pranë vendit të quajtur “5 Heronjtë e Vigut” në Shkodër, bashkë me disa persona të tjerë.
Disa vite më parë policia dhe prokuroria sekuestroi një pallat me vlerë 2 milionë Euro në pronësi të 46-vjeçarit, i cili u vu nën akuzë për tre vepra penale “Pastrim parash”, “Falsifikim dokumentesh” dhe “Ndërtim pa leje”.
I forti i Shkodrës ishte arrestuar edhe për trafik droge, por para arrestimit ai u lakua në media, pasi iu fsheh policisë duke udhëtuar në makinën e ish-deputetit Mark Frroku.
