Bujar Leza e ka mohuar përfshirjen e tij në vrasjen e biznesmenit Behar Sofia, ngjarje e ndodhur 10 muaj më parë në Tiranë
Leza, u arrestua të dielën pas hetimeve të SPAK. I dyshuari u la në burg të hënën e 27 dhjetorit nga Gjykata e Posaçme, GJKKO.
Sipas SPAK, Leza është personi që ka mbajtur nën vëzhgim biznesmenin Behar Sofia.
Burimet bëjnë me dije se sot në GJKKO, Leza i ka mohuar akuzat e ngritura në gjyq dhe është përlotur.
“Nuk kam lidhje me vrasjen e Behar Sofisë dhe as me vrasje të tjera. Për pak ditë do dilja nga burgu”, ka deklaruar ai.
45 vjeçari Leza, nga fshati Larushk i Krujës, iu komunika të dielën akuza në qelitë e burgut, pasi është arrestuar më parë për dhunë në familje.
AKUZA
Policia tha zyrtarisht se në drejtimin e SPAK-ut, për zbardhjen e plotë dhe dokumentimin me prova ligjore të ngjarjes së ndodhur më datë 25 shkurt 2021, ku u vra me armë zjarri shtetasi Behar Sofia, 66 vjeç, si rezultat i hetimeve dhe provave të grumbulluara, është bërë i mundur identifikimi i bashkëpunëtorit në këtë vrasje.
“Bazuar në provat e grumbulluara, Gjykata e Posaçme Kundër Korrupsionit dhe Krimit të Organizuar ka caktuar masën e sigurisë ‘Arrest në burg’, për shtetasin B. L., 45 vjeç, banues në Larushk, Krujë”, tha dje zyrtarisht Policia e Tiranës.
Specialistët e Sektorit për Hetimin e Krimeve të Rënda ndaj Jetës dhe Pronës në DVP Tiranë kanë bërë ekzekutimin e masës së sigurisë ndaj këtij shtetasi në ambientet e burgut të FushëKrujës, i cili ndodhet i paraburgosur për veprën penale “Dhuna në familje”.
Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë, në ngarkim të shtetasit Bujar Leza, për veprat penale “Vrasja me paramendim” dhe “Mbajtja pa leje e armëve, armëve shpërthyese dhe municionit”, kryer në bashkëpunim të veçantë, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
