Ministria e Drejtësisë ka reaguar lidhur pas ekstradimit në Itali të Nazer Seitit, i cili cilësohet si financieri i grupit ‘Habilaj’. Në një reagim për mediat MD thekson se për ekstradimin janë ndjekur të gjitha procedurat në bazë të ligjit.
Mes të tjerash ministrja e Drejtësisë bën me dije se pas njoftimit për arrestimin e Seitit si dhe për urdhër-arrestin e lëshuar nga Itali.
- REAGIMI ZYRTAR I MINISTRISË
Ministria e Drejtësisë në reagim të lajmeve të publikuara sot, lidhur me ekstradimin e shtetasit Nezar Seiti, sqaron se janë ndjekur me përpikmëri të gjitha procedurat ligjore të parashikuara në Kodin e Procedurës Penale, Ligjin nr. 10193 datë 3.12.2009, Konventës Evropiane të Ekstradimit, të vitit 1957, Marrëveshjen ndërmjet Republikës së Shqipërisë dhe Republikës së Italisë dhe Konventës Evropiane për ndihmë juridike dhe çështje penale.
Ministria e Drejtësisë në datë 20.10.2017, është njoftuar nga Interpoli Tiranë, mbi arrestimin e shtetasit Nezar Seiti po në datën 20.10.2017, me qëllim ekstradimin drejt Italisë, në bazë të Urdhrit Arrestit Ndërkombëtar të lëshuar nga Gjykata e Catanias, në datë 12.10.2017, për kryerjen e veprës penale “Organizatë kriminale me qëllim trafikimin e narkotikëve”, parashikuar nga legjislacioni penal italian.
Ministria e Drejtësisë në datë 24.10.2017, i ka përcjellë Prokurorisë së Përgjithshme njoftimin e Interpolit Tiranë, me qëllim kryerjen e veprimeve nga ana e Prokurorisë për të kërkuar nga autoritetet italiane dërgimin e akteve. Ministria e Drejtësisë shqiptare, menjëherë pas marrjes së kërkesës të datës 24.11.2017 nga Ministria e Drejtësisë italiane për ekstradim të shtetasit Nezar Seiti, ia ka përcjellë atë Prokurorisë së Përgjithshme.
Prokuroria e Përgjithshme në datë 10.01.2018, ka vënë në dijeni Ministrinë e Drejtësisë lidhur me vendimin e Gjykatës së Rrethit Gjyqësor Tiranë me Nr. 1506, datë 18.12.2017, i cili ka marrë formë të prerë më datë 29.12.2017, duke vendosur miratimin e kërkesës së Prokurorisë së Rrethit Gjyqësor Tiranë për lejimin e ekstradimit të shtetasit Nezar Seiti.
Gjykata në pjesën arsyetuese të vendimit Nr. 1506 datë 18.12.2017 është shprehur se nuk ka asnjë pengesë ligjore për të mos e lejuar ekstradimin në perputhje me parashikimet ligjore të brendshme dhe ato ndërkombëtare.
Gjithashtu në pjesën arsyetuese të vendimit të gjykatës, është shprehur se nga ana e prokurorisë është argumentuar se nuk ekziston asnjë nga pengesat ligjore të parashikuara nga neni 491 i Kodit të Procedurës Penale, i cili parashikon rastet kur nuk mund të jepet ekstradimi.
Bazuar në këtë vendim të Gjykatës së Rrethit Gjyqësor Tiranë, Nr. 1506 datë 18.12.2017, i cili ka marrë formë të prerë në datë 29.12.2017, përcjellë nga Prokuroria e Përgjithshme tek Ministria e Drejtësisë në datën 10.01.2018, dhe në kushtet kur Ministria e Drejtësisë nuk ka patur asnjë informacion apo akt tjetër procedurial nga Prokuroria e Përgjithshme si dhe nga gjykata mbi ekzistencën e ndonjë pengese të mundshme ligjore për ekstradimin e shtetasit Nezar Seiti, në zbatim të parashikimeve ligjore të nenit 499 të Kodit të Procedurës penale, ka dhënë miratimin për ekstradim.
- EKSTRADIMI
Vendimi për lejimin e ekstradimit u mor në dhjetor të vitit të kaluar nga gjykata e Tiranës, sipas kërkesës së prokurorisë dhe me pelqimin e vetë të dyshuarit.
Ndaj Seitit gjykata e Catanias kishte firmosur masën e sigurisë “arrest me burg” në mungesë, me dyshimin për trafik narkotikësh në kuadër të grupit të struktuar kriminal.
Pasi vendimi mori formë të prerë, çështja kaloi në duart e Ministres së Drejtësisë, si hallka e fundit që vendos për fatin e të kërkuarit. Burime thanë se pasi shqyrtoi dosjen, Gjonaj hodhi firmën dhe brenda pak ditësh i dyshuari iu dorëzua autoriteteve të shtetit fqinj.
Ekstradimi i vlonjatit, vjen në një kohë që ndaj tij ka një masë sigurie “arrest me burg”, në kuadër të hetimeve të çelura nga Prokuroria për Krime të Rënda, për ish-ministrin e Brendshëm Saimir Tahiri.
Pak ditë më parë, prokurorët kësaj dosje firmosën për zgjatjen e afateve të hetimit edhe për tre muaj të tjerë, vendim që i është komunikuar këtë të enjte avokatit të Seitit.
Dorëzimi i beftë i vlonjatit tij tek autoritetet italiane, ngre jo pak dyshime. Prokuroria e Catanias e cilëson Nezar Seitin, si një person kyç që ka dijeni mbi shtrirjen dhe funksionimin e grupit kriminal “Habilaj”.
Përgjatë katër muajve që qëndroi i paraburgosur në vendin tonë, Nezar Seiti e kyçi gojën për hetuesit shqiptarë, por nuk dihet nëse do të veprojë njësoj përpara prokurorëve në Itali.
Nezar Seiti që konsiderohet si një nga njerëzit më të besuar të Moisi Habilajt, u arrestua në Babicë të Vlorës më 19 Tetor të vitit të kaluar gjatë një operacioni antidrogë ku u sekuestruan rreth 4 ton kanabis.