Institucionet e specializuara të drejtësisë së re, janë vënë në lëvizje edhe më shumë, sidomos pas vendimit të Sekretarit Amerikan të Shtetit Rex Tillerson, që firmosi ndalimin e familjes së ish Kryeprokurorit të Shqipërisë Adriatik Llalla për tu futur në SHBA me argumentimin se sipas tyre, ai është i përfshirë në raste të mëdha korrupsioni.
Në këtë kuadër sot ka ardhur edhe një levizje tjetër në drejtim të faktimit të mëtejshëm të këtyre akuzave. Ambasadori amerikan Lu, një javë më parë kur z. Llalla dorëzoi deklaratën se tërhiqej nga sistemi i drejtësisë, duke i shpëtuar në këtë mënyrë kontrollit formal nga vettingu, tha se për të korruptuarit do të ketë shumë shpejt ndjekje penale.
Burime të sigurta i thanë Alpenews.al se të gjitha provat dhe dëshmitë e botuara prej nesh gjatë këtyre tri ditëve, rreth jetës luksoze të familjes së ish Kryeprokurorit të Shqipërisë Adriatik Llalla, janë marë dhe depozituar për të plotësuar me prova dhe fakte të reja dosjen e tij.
Të gjitha faktet dhe fotot e publikuara janë marë gjithashtu, dhe po analizohen për të krijuar një bindje edhe më të madhe rreth provave të tjera për raste konkrete që ata me sa duket kanë, për z. Llalla. Provat dhe dëshmitë tona, nuk kanë vlerë juridike, por ato janë pasqyra më e mirë për të parë të reflektuar në jetën reale, standardin marramendës të jetesës së familjes së ish Kryeprokurorit, në raport me të ardhurat nga puna e tij dhe e bashkëshortes, si zyrtarë të shtetit shqiptar.
Interesi më i madh, duket se është rreth fotos përvëluese të publikuar nga Alpenews.al ku ish Prokurori i Pergjithshem i Shqipërisë, faktohet se është duke kaluar pushimet luksoze me një superjaht gjigand.
Burimet thanë se këto botime, i kanë ndihmuar ekspertet antikorrupsion që po merren me grumbullimin e provave dhe fakteve përpara konkludimit pranë organeve të ndjekjes penale, për tu fokusuar në një hapësirë ku vërtetimi i parave të ardhura nga korrupsioni në përmasa të mëdha, është edhe më i thjeshtë për tu perceptuar e më pas vërtetuar.
Në ditët në vijim priten zhvillime konkrete në këtë linjë.
Pyetjet naive që kemi shtruar këto ditë kanë qenë:
A është Adriatik Llalla një “peshk i madh”?
Dhe:
A është ai i korruptuar, siç thotë sekretari Amerikan i Shtetit, Rex Tillerson?
Të presim e të shohim. Një gjë është e sigurtë se dosje e tij, sapo është pasuruar me prova dhe fakte të reja. Kjo dosje ndodhet pranë KPK (Komisioni i Pavarur i Hetimit) ku z. Llalla ka plotësuar me dorën e tij edhe deklaratat e pasurisë.
Alpenews.al
