Gjykata e Apelit zbardhi vendimin ndaj ish kryeprokurorit Adriatik Llalla, i dënuar me 2 vite burg për akuzën e mosdeklarimit të pasurisë. Zbardhja e vendimit i hap rrugë edhe rekursit në Gjykatën e Lartë që pritet të bëhet nga avokati Sokol Hazizaj.
Sipas Gjykatës së Apelit ish-kryeprokurori Llalla, u gjet fajtor për mosdeklarim dhe fshehje pasurie në 3 episode.
Konkretisht, sipas provave vërtetohet thotë Gjykata se Llalla nuk ka deklaruar një shumë prej rreth 7000 dollar për lindjen e djalit të tij, shpenzimet për ndërtimin e katit të tretë te banesës si dhe shpenzime në gjermani.
Gjithashtu ndaj ish kryeprokurorit gjykata vendosi konfiskimin e disa pasurive dhe përjashtim nga funksionet publike për 5 vite.
Llalla prej disa javësh ndodhet në kërkim ndërkombëtar pasi iu shmang drejtësisë një javë para se Gjykata e Apelit të jepte vendimin e formës së prerë.
Koronologjia
Ish kryeprokurori Adriatik Llalla u shpall fajtor dhe u dënuar me dy vite burg nga Gjykata e Posaçme Antikorrupsion, shkalla e dytë, për fshehje të pasurisë.
Kanë qenë tre raste, kur Llalla ka deklaruar pasurinë në mënyrë të rreme.
Një rast kur nuk ka deklaruar një shumë prej rreth 7000$ për lindjen e djalit të tij, një rast të dytë në lidhje me shpenzimet për ndërtimin e katit të tretë te banesës si dhe rasti i tre ka lidhje me shkollimin e vajzës së tij në Gjermani.
Aktualisht Llalla është i shpallur në kërkim ndërkombëtar, ndërkohë i janë sekuestruar edhe disa pasuri si një apartament në Durrës dhe rreth 22 mijë m2 tokë arë ne periferi të Tiranës.
Apeli i GJKKO-së, ka vendosur që Llalla për 5 vite nuk duhet te ushtrojë asnjë funksion publik.
Llalla, fillimisht u dyshua për të paktën katër vepra penale; mosdeklarim i pasurisë, mosdeklarim i të hollave në pikat kufitare, shpërdorim i detyrës dhe pastrim i parave.
Por në fund të hetimeve gjithçka u reduktua te mosdeklarimi i pasurisë, i cili dënohet nga gjobë deri në 3 vjet burgim.
Hetimi pasuror ndaj zotit Llalla u bazua në të ashtuquajturin ligji Antimafia, sipas të cilit, barra e provës për të dëshmuar se pasuritë e sekuestruara janë të ligjshme, i takonte ish Prokurorit të Përgjithshëm.
Sipas gjykatës, pasuritë e tij janë rivlerësuar nga 2 deri 16 herë, duke bërë që vlerat e tyre të kapin shifra të larta.
Zoti Llalla u largua nga detyra në përfundim të mandatit në dhjetor të vitit 2017. Pak muaj më pas, Departamenti amerikan i Shtetit njoftoi se i kishte ndaluar atij dhe familjes së tij, hyrjen në Shtetet e Bashkuara, duke shpjeguar se Sekretari i atëhershëm i Shtetit Rex Tillerson, e miratoi masën e ndalimit për shkak të përfshirjes së ish zyrtarit shqiptar në raste të mëdha korrupsioni.
Ai u bë zyrtari i parë shqiptar ndaj të cilit autoritetet amerikane zbatuan ligjin 7031, për përcaktimin e personave të përfshirë në akte të rënda korruptive.
Ish Prokurori i Përgjithshëm, Adriatik Llalla, bëhet po ashtu i pari zyrtar i lartë që dënohet me burgim nga institucionet e reja të dala nga Reforma në Drejtësi.
