Ylli në ngritje i muzikës latine, DELAROSA, emri i vërtetë Maria De La Rosa, vetëm 22 vjeçe është vrarë me armë zjarri në një sulm të dhunshëm në Los Angeles, ndërsa dy persona të tjerë kanë mbetur rëndë të plagosur.
Ngjarja ndodhi në orët e para të mëngjesit të së shtunës, rreth orës 01:30, në lagjen Northridge të Luginës së San Fernando. Sipas policisë, dy persona të armatosur iu afruan në këmbë një automjeti të parkuar në Bryant Street dhe hapën zjarr ndaj pasagjerëve, në një sulm që dyshohet se ka qenë i organizuar dhe i qëllimshëm.
Brenda makinës ndodheshin tre persona. Të tre u qëlluan, ndërsa DELAROSA u transportua me urgjencë në spital, ku nuk mundi t’u mbijetojë plagëve. Dy të plagosurit e tjerë mbeten në gjendje kritike.
Hetuesit e LAPD po punojnë për të identifikuar autorët dhe për të përcaktuar motivin e sulmit, ndërsa deri tani nuk është kryer asnjë arrestim. Policia po heton edhe pistën e përplasjes mes bandave.
DELAROSA ishte një emër në rritje në skenën e muzikës latine dhe së fundmi kishte publikuar këngën “No Me Llames”, me të cilën nisi të fitonte vëmendjen e publikut. Vdekja e saj ka sjellë reagime të shumta në rrjete sociale, ku fansa dhe artistë kanë shprehur trishtimin për humbjen e saj të parakohshme.
