Gratë që vuajnë nga dhimbje të forta menstruale mund t’iu lejohen deri në 3 ditë pushim nga puna sipas një plani reformash që pritet të miratohet nga qeveria e Spanjës javën e ardhshme.
Kjo do të ishte hera e parë që një gjë e tillë ndodh në Europë sepse disa shtete aziatike si Japonia, Koreja e Jugut dhe Tajvani e kanë tashmë si ligj.
Studime të mëparshme konstatojnë se 60-90% e grave vuajnë nga dhimbje të forta të ciklit dhe në Spanjë preken 75% e tyre. Angela Rodriguez, Sekretarja e Shtetit për Barazi dhe kundër Dhunës Gjinore dha edhe një specifikë të lidhur me këtë ligj:
“Është e rëndësishme të kuptojmë se ç’është një cikël menstrual i dhimbshëm, nuk po flasim për pak shqetësim, por simptoma serioze si diarre, dhimbje të forta koke, temperaturë”.
Pecetat higjienike dhe tamponët do të jenë falas për gratë dhe vajzat pa mundësi ekonomike si dhe në raftet e supermarketeve do të hiqet TVSH-ja për këto produkte.
“E drejta e shëndetit menstrual nuk është diskutuar kurrë dhe të dhënat janë ngjethëse. Një në katër gra nuk mund të zgjedhë produktet e higjienës femërore për asye financiare. Ja pse propozojmë që ato të mos paguajnë në qendra edukative dhe sociale”, shtoi Rodriguez.
Pjesë e kësaj reforme do të jenë edhe shkollat, të cilat do të sigurojnë produktet për vajzat që kanë nevojë.