Një 40-vjeçar shqiptar është ndaluar nga policia italiane në rajonin e Pulias, pasi dyshohet për përfshirje në vrasjen e 46-vjeçares Ornella Forastefano. Trupi i gruas u gjet i pajetë përpara repartit të urgjencës së spitalit të Trebisaces, në Kalabri.
I dyshuari është identifikuar si Elvis Metvelaj, i lindur në Shqipëri në vitin 1984 dhe prej disa vitesh banues në Kalabri. Sipas informacioneve të deritanishme, Metvelaj dhe Forastefano frekuentoheshin prej kohësh. Marrëdhënia e tyre, megjithatë, mësohet se kundërshtohej nga familjarët e 46-vjeçares.
Familja e viktimës njihet në zonë edhe për shkak të përfshirjes së disa anëtarëve të saj në hetime të mëparshme të antimafias. Megjithatë, autoritetet italiane kanë sqaruar se, deri në këtë fazë të hetimeve, nuk ka elementë që ta lidhin vrasjen me këto rrethana.
Mediat italiane raportojnë se Metvelaj ka pasur më parë probleme me drejtësinë. Në vitin 2020 ai rezulton të jetë arrestuar në kuadër të një çështjeje për trafik droge.
Prokuroria e Castrovillarit po vijon procedurat ndaj 40-vjeçarit, ndërsa hetimet për vdekjen e Ornella Forastefanos janë ende në fazën fillestare. Një nga pistat që po verifikohet është se gruaja mund të jetë vrarë në një vend tjetër dhe trupi i saj të jetë transportuar më pas pranë spitalit.
Hetuesit po përpiqen të rindërtojnë lëvizjet e viktimës dhe të të dyshuarit në orët përpara ngjarjes. Ekzaminimet mjeko-ligjore, analizimi i pamjeve të kamerave të sigurisë dhe të dhënat telefonike pritet të ndihmojnë në përcaktimin e vendit dhe shkakut të vdekjes, si dhe në sqarimin e rolit që dyshohet se ka pasur Metvelaj në ngjarje.
