Një biznesmen në Elbasan në shënjestër për ta eliminuar, ka arritur t’i shpëtojë për herë të dytë një atentati pas ndërhyrjes së Policisë dhe arrestimit të autorëve.
Një ditë pasi përfunduan në pranga Luis Gaxha dhe Rigers Spahiu me një arsenal të tërë armësh, këta të fundit dyshohet se synonin të ekzekutonin një biznesmen të njohur në qytet. Fotot e biznesmenit janë gjetur në celularin e të arrestuarit tjetër, Xhafer Deliu, i arrestuar më 7 tetor me gjysmë kilogramë lëndë narkotike heroinë.
Në telefonin e tij ishte fotografia e të njëjtit biznesmen, i cili më herët ishte shënjestër për t’u vrarë nga Nuredin Dumani, aktualisht i arrestuar si vrasës me pagesë dhe që ka zbuluar një sërë krimesh. I njëjti biznesmen dyshohet të ishte në plan për t’u eliminuar nga Gaxha dhe Spahiu, të arrestuar gjatë së enjtes, pasi në banesën e të parit u gjetën armë zjarri kallashnikov me silenciatorë.
“Në këtë kuadër, mbështetur dhe me inteligjencë informative të siguruar në kohë reale nga ana e strukturave të Hetimit të Krimit të Drejtorisë Vendore të Policisë Elbasan, duke koordinuar veprimet dhe hetimet me Prokurorinë pranë Gjykatës së Rrethit Gjyqësor Elbasan, me qëllim parandalimin e një ngjarjeve të mundshme kriminale me pasoja të rënda për jetën, më datë 20.10.2022 është finalizuar operacioni policor i koduar ‘Prevention’.
Falë marrjes në kohë të informacionit, koordinimit me Prokurorinë dhe Gjykatën, si dhe veprimeve operacionale, hetimore e procedurale të autorizuara nga Gjykata e Shkallës së Parë Elbasan u bë e mundur gjetja dhe sekuestrimi, në një banesë, në lagjen ‘Gurabardhi’, të qytetit të Elbasanit, i një arsenali armësh zjarri, disa prej tyre të pajisura me silenciatorë, gati për veprim”, sqaroi Policia. Konkretisht, në banesën e shtetasit Luis Gaxhi, u gjetën 4 armë zjarri kallashnikovë, dy prej të cilave të modifikuara dhe me silenciatorë; 3 pistoleta me silenciatorë; 2 mina me telekomandë, të gatshme për t’u aktivizuar për shpërthim me komandim në distancë, nëpërmjet aparateve celulare; kapsolla detonatorë; një sasi lënde plasëse, e dyshuar “C4”, si dhe një sasi e konsiderueshme municioni luftarak, blindëshpues.
