Ishte nisur nga Shqipëria, vendlindja e tij, për t’u kthyer në Itali, e cila për shumë vite ka qenë atdheu i tij i dytë. Por që pas nisjes së atij udhëtimi, prej mbi dy javësh prej tij nuk pati më asnjë gjurmë. Dhe duke qenë se bëhej fjalë për një refugjat të vërtetë politik, i përndjekur nga një regjim të cilin e kishte hetuar, kjo çështje bëhet edhe më e dyshimtë. Prokuroria shqiptare ka nisur një hetim për rrëmbim personi. Besnik Muço ka qenë Prokurori i Përgjithshëm i Tiranës.
Por funksioni i tij i kishte vënë kundër armiqësinë e regjimit, sidomos pas një hetimi të nisur ndaj një ministri rreth mesit të viteve ’90, shkruan portali italian Il Resto del Carlino.
Për këtë arsye gjatë revoltave të marsit 1997, kur në shtetin ballkanik pati një periudhë anarkie dhe dhune, me shpërthimin e fenomeneve të krimit të organizuar, prokurori, gruaja dhe i biri ishin larguar për në Itali dhe ishin vendosur në Macerata, ku ishin strehuar si refugjatë politikë në kuadër të punës së kryer nga burri në vendin e tij të origjinës.
Familja ishte sistemuar në Macerata, ku ai kishte punuar gjithnjë si saldator për një firmë në Piediripa, nga ku e nisën nga zero. Atje, ku ju erdhën dhe të afërm të tjerë, lindi edhe vajza e çiftit. Prindërit kishin krijuar një rrjet lidhjesh dhe miqësish në qytet, ndërkohë që fëmijët e tyre rriteshin. Tani djali i madh po përfundon studimet në Kopenhagen, ndërsa vajza më e vogël studion në Romë. Përpara katër vjetësh, Muço, pasi e kishte humbur vendin si punëtor, u përpoq ta riniste profesionin për të cilin kishte studiuar në Tiranë dhe kishte hapur një zyrë avokatie përpara Prokurorisë, së bashku me një ortak. Puna po u ecte mirë, dhe periodikisht Muço kthehej në Macerata te familja e tij. Mbrëmjen e 2 nëntorit ai u nis nga porti i Durrësit. Hipi në tragetin për në Bari dhe në orën 23 celulari i tij u fik.
Që nga ai moment nuk u rindez më. Ai nuk zbriti në Bari. Duke mos patur më ansjë lajm prej tij, gruaja Raimonda që jeton në Macerata, lajmëroi karabinierët, të cilët njoftuan autoritetet shqiptare. Nga hetimet e para, u zbulua se në Portin e Barit kishin vënë re se në traget kishte një fanellë dhe një çantë që kishte brenda dokumentat italiane dhe shqiptare të Muços (i cili ka shtetësi italiane dhe kombësi shqiptare), por nuk kishte asnjë gjurmë tjetër prej tij.
Me sa duket, në Itali duket se nuk mbërriti kurrë. Policia kontrolloi banesën e tij në Tiranë, në të cilën nuk gjeti asgjë të çuditshme. Ashtu sikurse nuk sinjalizoi asgjë të çuditshme vëllai i avokatit, i cili kishte folur me të përpara nisjes: Muço nuk kishte shfaqur asnjë shqetësim, dhe kishte lajmëruar se do të shkonte të rrinte disa ditë në Itali. Por për këtë udhëtim nuk dinte asgjë gruaja, e cila u befasua shumë kur mësoi se ai ishte nisur, aq më tepër që me traget, diçka e çuditshme pasi ai udhëtonte gjithnjë me avion. Gruaja tepër e shqetësuar, tani është në Tiranë për të ndjekur hetimet për zhdukjen e mistershme të burrit, kurse fëmijët janë në Itali me gjyshërit në pritje të ndonjë lajmi.
