Kryetari i PS Edi Rama nuk ndalet edhe pas 30 Qershorit.
Pas dy mbledhjeve të njëpasnjëshme të Kryesisë e sëfundi edhe Asamblesë Kombëtare, mësohet se Kryeministri do të mbledhë sekretariatin e sapo riformatuar të Partisë Socialiste. Të enjten, më 25 korrik ora 08.30 në selinë rozë, sekretariati pritet të diskutojë rreth detyrave specifike, fokusit dhe axhendës së punës.
Ndryshimet që u votuan në mbledhjen e Asamblesë Kombëtare të PS të martën e kësaj jave, ishin caktimi i Lindita Nikollës në rolin e sekretares për burimet njerëzore në PS, në vend të Senida Mesit.
Ilir Beqja, do të drejtojë sekretariatin për koordinimin e punës së Këshillave, sipas formulës së re të organizimit të punës në terren nga kupola drejtuese e PS me 3 zona: Veri, Qendër dhe në Jug të Shqipërisë.
Arben Pëllumbi krahas detyrës së sekretarit të organizimit në PS, do të mbulojë edhe koordinimin elektoral të kësaj partie.
Blerina Gjylameti do të drejtojë sekretariatin e organizimit digjital të socialistëve.
Gent Caka do të drejtojë sekretariatin për çështjet rinore.
Ndërsa Alfred Peza krahas sekretariatit për marrëdhëniet me Mediat dhe Shoqërinë Civile do të mbulojë edhe koordinimin e punës me Forumet Qytetare.
Ndërkohë që opozita e rrugës vijon hallakatjet e saj jashtë sistemit politik të vendit, mazhoranca brenda 3-4 javësh pas 30 qershorit, zhvilloi analizën e punës së drejtuesve të saj për fushatën dhe rezultatet e zgjedhjeve lokale. Krahas kësaj, bëri edhe organizimin e formatimin e ri të drejtimit politik të punës dhe nisi fushatën për zgjedhjet e reja brenda PS, në të gjitha nivelet e saj.
Përmes 5 etapave kalendarike, PS pritet ta zhvillojë këtë proces deri në fund të këtij viti dhe në janar, gjithçka pritet të kulmojë me Kongresin e janarit 2020. /AlpeNews.al
