Në vitin 2002 në krye të Federatës Shqiptare të Futbollit erdhi Armand Duka, i cili ndryshoi rrënjësisht imazhin e këtij institucioni.
Deri më sot, kur po bëhen 16 vjet që nga ajo kohë, Duka vazhdon të jetë president i FSHF-së, madje do të garojë s?7rish për mandatin e tij të pestë.
Duka ka zbuluar të ardhurat e FSHF-së nga sponsorizimet, duke i bërë një krahasim nga viti 2002 deri sot (2018).
Me anë të një postimi në Facebook, Duka shkruan se: “Falë menaxhimit shumë më të mirë të FSHF-së dhe përkushtimit për të siguruar mbështetjen e duhur për futbollin, sot kemi arritur në 3.35 milionë euro të ardhura, ose 335 herë më shumë”.
Postimi i plotë i Dukës në Facebook
“Me 10 mijë marka gjermane, të ardhura nga sponsorizimet, e gjetëm futbollin shqiptar në vitin 2002. Falë menaxhimit shumë më të mirë të FSHF dhe përkushtimit për të siguruar mbështetjen e duhur për futbollin, sot kemi arritur në 3.35 milionë euro të ardhura, ose 335 herë më shumë.
Për të gjithë ata që mendojnë se 4 mandate në krye të FSHF janë shumë, dua t’ju kujtoj se janë shumë herë më të mëdha punët dhe rezultatet që kemi arritur së bashku me komunitetin e futbollit. Do të vazhdojmë të punojmë fort në 4 vitet e ardhshme, për të bërë më të mirën për futbollin”.