Dyshimet për trafik të drogave të forta nga vendet e origjinës drejt Shqipërisë me mjete lundruese, duke shfrytëzuar mallrat e ndryshme që eksportohen nga këto vende, ka bërë që të shtohen kontrollet mbi kontejnerët.
I tillë ishte edhe rasti i dy ditëve të fundit, ku specialistët e antidrogës në policinë e Durrësit kanë përqendruar vëmendjen tek kontejnerët që vinin nga Kolumbia.
Gazetarja Doriana Bezat raporton për “BalkanWeb” se shkak për kontrollin e imtësishëm në kontejnerin ku u gjet sasia e konsiderueshme e kokainës, prej 613 kilogramësh, u bë fundi i dyshimtë i tij.
Pas dyshimeve për modifikime të strukturës, kontejneri u kalua në skaner, nga ku u zbulua edhe lënda narkotike.
Nisur nga të dhënat e deritanishme për hetimin, mësohet se kontejneri është mbajtur në vëzhgim që prej datës 27 shkurt, ku pas procedurave të zhdoganimit, ai u tërhoq nga Donaldo Lushaj dhe Armando Pezaku. Pas mbërritjes në magazinën në Maminas ka ndërhyre policia, duke finalizuar operacionin.
Mësohet se kompania “Arger Garden” ka aktualisht në Portin e Durrësit edhe 2 kontejnerë të tjerë me banane, të cilët pritet të kontrollohen sot pasi të kryhen procedurat doganore.
