Pavarësisht tentativave të vazhdueshme për t’i hequr nga duart kreut të Këshillit të Emërimeve në Drejtësi , Ardian Dvorani emrat e rinj për Gjykatën Kushtetuese , presidenti duket se ka dështuar .
Ilir Meta ka intensifikuar kohët e fundit tentativat për të shkarkuar zotin Dvorani nga KED , por ditën e djeshme është bërë e qartë se edhe tre emrat që do të emërohen nga Presidenca dhe Kuvendi do të jenë sërish në dorë të tij . Kjo gjë është bërë dje e ditur nga vetë Dvorani gjatë mbledhje së Këshillit Kombëtar të Integrimit Europian , i cili sfidoi presidentin Meta , ndërsa zbuloi se Këshilli i Emërimeve në Drejtësi do të përshpejtojë procedurat për zgjedhjen e kandidatëve për Kushtetuese . Sipas tij , brenda korrikut emrat e kandidatëve do të jenë në Presidencë dhe Kuvend .
” KED do të mblidhet pas disa ditësh dhe do të shqyrtojë procedurat për 2 kandidatët që janë në proces për të gjitha vendet vakante , ashtu sikurse është edhe në planin për të cilin ne kemi folur nëse do të kemi tre kandidatë të lejuar për kandidim , atëherë duke llogaritur edhe periudhën e parashikuar nga ligji për ankimimin e kandidatëve do të kemi mundësi që brenda muajit korrik do të mund të kemi mundësi që të bëjmë vlerësimin dhe t’i përcjellim Presidentit të Republikës dy listat për anëtarët e Gjykatës Kushtetuese Është edhe një vend i tretë vakant për të cilin është Presidenti i Republikës organ emërtese , për të cilin është punuar , por është vonuar pikërisht për shkak të situatës së pandemisë së Covid – 19 dhe ardhjes së informacioneve nga subjekte dhe institucioneve . Megjithatë , situata është përmirësuar ndjeshëm dhe për këtë vend vakant ka ardhur informacioni , ku parashikojmë që brenda muajit korrik të bëjmë renditjen dhe t’ia përcjellim listën presidentit ” , deklaroi Dvorani .
Më tej , zoti Dvorani theksoi se Këshilli i Emërimeve në Drejtësi do të mblidhet pavarësisht vendimit që do të japë KLGJ për fatin e tij si anëtar i Gjykatës së Lartë .
” KLGJ do të vendoset se funksioni im si anëtar i Gjykatës së Lartë ka përfunduar nga data 15 mars 2020 . Kjo është një situatë që e ka penguar mbledhjen e KED dhe me aq sa jam vënë në dijeni sot që duhet t’ju vë në dijeni edhe juve që Këshilli i Lartë Gjyqësor duhet të marrë edhe një vendim për këtë çështje , situata menjëherë pas këtij vendimi dhe në çfarëdo lloj vendimi që të marrë KLGJ , Këshilli i Emërimeve në Drejtësi do të mblidhet dhe të shqyrtojë procedurat për 2 kandidatët ” , nënvizoi Dvorani .
Megjithatë , plotësimi i Gjykatës Kushtetuese nuk është vetëm në axhendën e Këshillit të Emërimeve në Drejtësi , por edhe në axhendën e qeverisë shqiptare , të cilës i është vënë kusht nga Brukseli që deri në tetor të ketë plotësuar me 6 anëtarë Gjykatën Kushtetuese dhe atë të Lartë , si dhe të ketë përzgjedhur kreun e Byrosë Kombëtare të Hetimit dhe anëtarëve të saj . Madje , në planin e hartuar në një dokument me 15 pika nga qeveria shqiptare , të cilat duhet të përmbushen deri në Konferencën e Parë Ndërqeveritare për çeljen e negociatave me Bashkimin Europian është edhe plotësimi i SPAK me 15 anëtarë .
“ Miratimi i reformës zgjedhore ; Funksionimi i Gjykatës Kushtetuese ; Funksionimi i Gjykatës së Lartë ; Finalizimi i ngritjes se strukturave kundër krimit të organizuar dhe anti korrupsionit / Funksionimi i SPAK ; Forcimi i luftës kundër korrupsionit dhe krimit të organizuar , në bashkëpunim me vendet anëtare dhe nëpërmjet Plan Veprimit për adresimin e krimit financiar ; Ulje e numrit të azilkërkuesve , ku një nga masat është bashkëpunimi me Holandën , Francën , BM , Gjermaninë , Italinë , Irlandën . Vazhdimi i Zbatimit të Planit Ndërinstitucional të Veprimit për
parandalimin e azilkërkimit të qytetarëve shqiptarë në vendet e Schengen – it ” , thuhet në dokumentin me 15 pika të hartuar nga Këshilli Kombëtar i Integrimit . Pra , duket qartë që kemi koordinim mes institucioneve për plotësimin e Gjykatës Kushtetuese .
