GJKKO ka caktuar datën 30 qershor për seancën e parë në themel ndaj Berishës, Malltezit dhe 3 të pandehurve të tjerë për aferën “Partizani”. Elsa Ulliri, Bib Ndreca dhe Rudina Palloj janë treshja e gjyqtarëve të caktuar për këtë çështje.
Ulliri është kryesuesja e trupës dhe është një ndër gjyqtarët e përfolura për afërsi me Partinë Demokratike për shkak të një lidhjeje familjare.
Lidhur me këtë ka folur për Report Tv edhe avokati Edmond Petraj i cili e ka komentuar rastin duke thënë se gjyqtarja moralisht duhet të japë dorëheqjen. Sipas Petrajt, gjyqtarja ka konflikt interesi për shkak të një lidhjeje familjare me një deputete të PD-së.
Gazetari: Çfarë mund të themi për çështjen Partizani që është në datën 30 qershor, një nga më të rëndësishmet në fakt?
Petraj: Shiko, kjo është një dosje maratonë për sa i përket raportit të shqyrtimit të provave. Do të jetë një element që duhet të fillojë nga pjesa morale e gjyqtares që duhet ta gjykojë. Do të jetë ajo pjesë që do të gjykojë këtë çështje apo jo. Moralisht duhet të shkëputet, duhet të heqë dorë, sepse ka një konflikt interesi në thonjëza, por jo që ndikon, por që ligjërisht nuk e kap. Por moralisht e kap sepse duket procesi i kontestuar. Pasi një njeri i afërt i saj është deputete dhe brenda strukturave të Partisë Demokratike ku është kryetar zoti Berisha. Moralisht duhet të japë dorëheqjen.
