Opozita është pajtuar me idenë se zgjedhje të parakohshme nuk do të ketë . Kryetarja e LSI – së , Monika Kryemadhi thotë se vendin e ndajnë 10 muaj kohë nga procesi i votimit , që përkon me afatin e propozuar në marrëveshjen e Këshillit Politik , që zgjedhjet të mbahen në prill – maj .
Gjatë një interviste të dhënë për “ News24 ” në emisionin e Sokol Ballës , kryetarja e LSI – së thotë se koha nuk premton për asnjë forcë politike që të përgatitet për përzgjedhjen e kandidatëve dhe fushatën elektorale . “ Jemi vetëm 10 muaj larg zgjedhjeve , jemi shumë vonë sa i përket angazhimit . Çdo parti është shumë vonë me përgatitjet ” , tha Kryemadhi . Kryemadhi zbuloi edhe faktin se LSI ka parë me rezerva propozimin e Partisë Demokratike që buxheti i shtetit të marrë përsipër peshën më të madhe të financimit të partive politike në fushatë elektorale . Ajo u shpreh gjithashtu e gatshme që të përballet me Edi Ramën .
” Ne si LSI jemi kategorikisht kundër financimit publik . Propozuesit përdornin logjikën se buxheti është më i kontrollueshëm . Nëse unë do të shkoj në zgjedhje me Edi Ramën kryeministër , probabiliteti për të shkuar drejt votimit është më i madh , pasi njerëzit do të shkojnë të votojnë kundër tij . Ndaj mua më leverdis prania e tij ” , deklaroi kryetarja e LSI – së . Kryemadhi e vlerësoi si strategji shpëtimit të Edi Ramës thirrjen për t’u takuar me Bashën dhe foli me bindje se një takim i tillë nuk ka për të ndodhur , përveçse tek kutitë e votimit .” Kur është keq Edi Rama bën thirrje për tryeza . Ata të dy ( Rama – Basha ) do të takohen në kutinë e votimit dhe jo më në tryeza ” , tha ajo .
Megjithatë , opozita është qortuar se me marrëveshjen e nënshkruar iu rikthye sistemit që me djegien e mandateve synoi që ta rrëzojë dhe i dha të drejtë Edi Ramës për zgjedhjet e 2017 , që PD – LSI i kanë sulmuar si të manipuluara dhe të blera me ndihmën e krimit të organizuar . Por , Kryemadhi bën një bilanc pozitiv të aksionit ekstrem më shumë se njëvjeçar të opozitës , përfshirë këtu edhe vendimin për të mos hyrë në zgjedhjet vendore të qershorit të vitit të kaluar .
“ Ne kemi arritur në një fitore në iluminimin e faktorit ndërkombëtar .
Ne jemi një pikë në oqeanin e tyre , ndonjëherë të nevojshëm si xhepa për të shkarkuar ndonjë problem që kanë , si me emigrantët . Kur gjërat bëhen më prezente , më flagrante si me teatrin fillojnë edhe të tjerët lëvizin . Lëvizin pak më vonë këtu te ne se jemi vend i vogël . Ndërkombëtarët kanë qenë ata që i thoshin vazhdo Ramës , kanë qenë muri kinez . Ky mur u shemb që ata të ruanin themelet e veta në vazhdimësi ” , tha Kryemadhi