Këto ditë fillon në të gjitha Drejtoritë Rajonale të ALUIZNI-t procesi i “dorëzimit të stafetës”. Pas shpalljes së rezultateve të konkursit të zhvilluar dhe shqyrtimit të ankesave, kandidatët e listës fituese po përgatiten të marin detyrën në Drejtoritë Rajonale.
Ky proces filloi dje në Drejtorinë Rajonale Durrës, me prezantimin e drejtorit të ri z. Arben Isaku, i cili zëvendëson në këtë detyrë z. Flamur Gjuzi. Drejtori i ri ka mbaruar për drejtësi në Universitetin e Piemontes, Itali.
Përgjatë viteve të fundit Drejtoria Durrës ka mbuluar një prej Qarqeve me më shumë problematika në procesin e legalizimit dhe ja ka dalë të jetë ndër drejtoritë pararojë në mbarëvajtjen e procesit.
“Mjafton të kujtojmë këtu se ekipi durrsak ja doli të kryejë legalizimet për 25.500 objekte, duke u renditur kështu i dyti në rang Republike. Gjejmë rastin këtu që, në emër të Ministrisë së Drejtësisë dhe të Drejtorisë së Përgjithshme, të falenderojmë drejtorin Flamur Gjuzi për punën dhe kontributin e tij të deritanishëm”- thuhet në njoftimin e ALUIZNI-t.
Më tej bëhet me dije se nesër ky proces do të vijojë me drejtorinë Rajonale Vlorë, ku do të prezantohet drejtori i ri z. Adrian Musta, që ka mbaruar për inxhinier ndërtimi.
Pas festave të fundvitit procesi i emërimit të drejtorëve të rinj, do të vijojë edhe me drejtoritë e tjera rajonale në të gjithë vendin. (TemA)
