Ambasadori gjerman në Kosovë, Christian Heldt, ka thënë se është e rëndësishme që Kosova së shpejti të ketë qeveri funksionale.
Ambasadori Heldt i pyetur nga REL për dorëheqjen e kryeministrit të Kosovës, Ramush Haradinajt, tha se Gjermania respekton pavarësinë e Dhomave të Gjykatës Speciale si dhe vendimin e kryeministrit Haradinaj.
‘Kosova vazhdon të ketë përballë sfida të rëndësishme politike, në veçanti dialogun politik me Serbinë dhe reformat e brendshme politike. Është e rëndësishme që Kosova së shpejti të ketë një qeveri funksionale’, është shprehur ambasadori gjerman.
Kujtojmë se kryeministri i Kosovës, Ramush Haradinaj, ka dhënë dorëheqje të premten pasi ka marrë ftesë për intervistim nga Gjykata Speciale në Hagë, në cilësinë e të dyshuarit.
Gjatë ditës së hënë ai përmes një letre i ka njoftuar krerët e institucioneve dhe liderët e partive politike të përfaqësuara në Kuvend, për vendimin e tij.
