Presidenti Ilir Meta ka refuzuar sot të komentojë drejtpërdrejtë dorëheqjen e Lulzim Bashës nga posti i kryetarit në Partinë Demokratike.
Në dalje për gazetarët gjatë kremtimit të Sulltan Nevruzit, Meta deklaroi se 22 Marsi është ditë historike për demokracinë ndërsa shtoi se pranvera është për të gjithë shqiptarët sepse ka lule pafund.
“Të gjallërohen për një të ardhme më të mirë dhe të begatë për mbarë kombin tonë. Pranvera është një stinë e jashtëzakonshme që nuk vjen kurrë me një lule. 22 marsin prej 22 vitesh e kemi festë të demokracisë. Ndaj dhe njëherë tjetër urimet më të mira për begatinë e çdo shqiptari dhe një të ardhme më optimiste duke punuar të gjithë së bashku dhe duke iu përkushtuar qëllimeve që e bëjnë Shqipërinë më të fortë edhe më demokratike.
Pranvera është për të gjithë qytetarët. Për të gjithë shqiptarët. Pranvera ka lule pafund. Mjafton të dilni edhe këtu në oborr. Është gjithëpërfshirëse. Këtu jemi për pranverën dhe unë e dua shumë pranverën për arsye se edhe kam lindur në pranverë. Madje edhe shumë pranë ditës së Sulltan Nevruzit. Emrin e dytë e kam Nevruz nga gjyshja.
E dua shumë pranverën. Nuk kam asnjë përgjigje për këto pyetje të cilat nuk kanë vend në oborrin e kryegjyshatës. Sot lutem që paqja dhe e mira të mbizotërojë në zemrën e çdo qytetari. Edhe për qytetarët që këtë pranverë po ndeshen me vështirësi më të mëdha për shkak të rritjes së çmimeve, Bashkohem me lutjet për paqen në Ukrainë. Le të jetë 22 Marsi mbarësi dhe të na ftojë të gjithëve për optimizën”, deklaroi Meta.
