Policia e Gjirokastrës ka arrestuar një 50-vjeçar që dyshohet se ushtronte veprimtarinë e kundërligjshme të lojërave të fatit si dhe ka kanosur për shkak të detyrës efektivin gjate operacionit.
“Specialistët e Seksionit për Hetimin e Krimit në Komisariatin e Policisë Gjirokastër arrestuan në flagrancë shtetasin H. Ç., 50 vjeç, banues në Gjirokastër, pasi ka kanosur me fjalë, për shkak të detyrës, punonjësin e Policisë të DVP Gjirokastër.
Gjatë kontrollit fizik nga shërbimet e Policisë, 50-vjeçarit i është gjetur një aparat celular, të cilin dyshohet se e përdorte për organizimin e basteve sportive online, në kundërshtim me ligjin.
Në vijim të veprimeve, gjatë kontrollit në subjektin (lokalin) e këtij shtetasi, u konstatuan duke luajtur lojëra fati nëpërmjet aparateve celulare, shtetasit G. P., 26 vjeç, banues në Gjirokastër dhe A. H., 46 vjeç, banues në fshatin Picar, Gjirokastër, të cilët u proceduan penalisht për veprën penale “Organizimi i lotarive të palejuara”, tha policia.
Ne kete foto te publikur nga polica bien ne sy edhe bisedat e 50-vjeçarit.
Në cilësinë e provës materiale u sekuestruan tre aparate celulare.
Materialet në ngarkim të shtetasve të mësipërm i kaluan Prokurorisë së Rrethit Gjyqësor Gjirokastër, për veprime të mëtejshme.
