Presidenti i SHBA-së, Donald Trump, u takua me kryebashkiakun e sapozgjedhur të qytetit të New York, Zohran Mamdani, në Shtëpinë e Bardhë.
Presidenti Trump pasi shtrëngoi duart me Zohran Mamdani u shpreh se ky i fundit “do të jetë një kryebashkiak i shkëlqyer”.
“Kemi një gjë të përbashkët”, tha Trump gjatë konferencës për mediat. “Duam që qyteti ynë, të zhvillohet. Dhe doja ta përgëzoja kryetarin e bashkisë. Ai me të vërtetë zhvilloi një garë të jashtëzakonshme kundër, e dini, shumë njerëzve të zgjuar, duke filluar me zgjedhjet e hershme paraprake kundër disa njerëzve shumë të fortë. Dhe ai i mundi ata, i mundi lehtësisht. Unë e përgëzova, dhe folëm për disa gjëra shumë të përbashkëta, si strehimi dhe ndërtimi i banesave, ushqimi dhe çmimet. Ne do ta ndihmojmë atë që ta bëjë realitet ëndrrën e të gjithëve, të kemi një New York të fortë dhe shumë të sigurt”.
Ndërkohë presidenti amerikan u shpreh për kryetarin e zgjedhur: “U takova me një burrë që është një person shumë racional. U takova me një burrë që me të vërtetë dëshiron ta shohë New York të jetë përsëri i madh… Mendoj se ai mund ta kthejë atë… Do të bëj tifo për të.”
Ndërsa kreu i zgjedhur i bashkisë së New York u shpreh se gjatë bisedës në zyrën Ovale diskutuan për strehimin dhe mënyrat për të përmirësuar qytetin.
“E vlerësova kohën që kalova me Presidentin. E vlerësova bisedën. Pres me padurim të punojmë së bashku”, theksoi Zohran Mamdani.
Duke shtuar se: “Mendoj se unë dhe Presidenti Trump jemi shumë të qartë në lidhje me qëndrimet dhe pikëpamjet tona. Dhe, sinqerisht, kjo është diçka që mund të transformojë jetën e 8.5 milionë njerëzve që aktualisht po përballen me një krizë të kostos së jetesës, me një në katër që jetojnë në varfëri.”
