I ftuar në emisionin ‘Kjo Javë’ në News 24, Kryetari i Grupit Parlamentar të Partisë Socialiste, Taulant Balla komentoi protestën e opozitës.
Në fjalën e tij, Balla duke folur për dorëzimin e mandateve të deputetëve të opozitës tha:
“Këtu në studion tuaj kam dëgjuar që një nga skenarët e PD-së ka qenë dhe dorëzimi apo lëshimi i mandateve të deputetëve.
Ka qenë pjesë e diskutimit dhe mesa ishte njoftuar në fund të protestës do të dorëzoheshin mandatet. Nuk e di nëse ideja për të enjten ka të bëjë me këtë variant.
Mos kini merak se Luli dhe Monika nuk i lëshojnë mandatet. Monika e ka shumë merak dhe pjesën e rrogës dhe nnuk i lëshojnë mandatet. Le të mbyllet këtu ky diskutim.
Nuk i lëshojnë mandatet. Ata bëjnë çdo gjë. U betuan që nuk do të vinin më në Kuvend dhe sa u plotësua 6 mujori erdhën aty si pulat pa dhënë asnjë arsye pse munguan.
Apeli im për opozitën është: Ne jemi të gatshëm dhe pas dhunës që bëtë sot që të hënën të ulemi bashkë me ju dhe të enjten të votojmë bashkarisht Reformën Zgjedhore, për të garantuar depolitizimin e plotë të komisionerëve në dy nivelet e para, për të garantuar testimin e teknologjisë së votimit dhe numërimit elektronik në një pjesë të qendrave të votimit dhe të kemi mundësinë që të adresojmë të gjitha rekomandimet e OSBE/ODHIR.
Mesazhin e morët nga qytetarët sot, duhet që të enjten të votojmë Reformën Zgjedhore.
