Serbia duket se ka gjetur mirëkuptimin e Kinës dhe së shpejti edhe të Rusisë në lidhje me zgjidhjen e konfliktit të saj me Prishtinën. Presidenti serb Aleksandër Vuçiç deklaroi pas takimit me homologun e tij kinez, Shi Xhinping, se Pekini, ndryshe nga fuqitë e mëdha të Perëndimit, gjithmonë të trajton me respekt dhe nuk të vë nën trysni. Megjithatë palët duken ende larg kompromisit kur i ndajnë vetëm katër ditë nga samiti i rëndësishëm i Berlinit ku çështja e Kosovës do të trajtohet sërish.
Çështja e dialogut me Kosovën dhe bashkëpunimi ekonomik mes Serbisë dhe Kinës ishin temat kryesore të takimit që presidenti kinez Shi Xhinping dhe homologu i tij serb, Aleksandër Vuçiç, patën të enjten në Pekin.
Takimi i dy liderëve në pallatin presidencial i parapriu nisjes së forumit treditor ndërkombëtar “Një Brez, Një Rrugë”, ku shtetet pjesëmarrëse janë përkushtuar të forcojnë më tej partneritetin me palën kineze.
Nga mediet vendëse mësohet se përpara firmosjes së një sërë marrëveshjeve ekonomike dypalëshe, presidenti Vuçiç e shfrytëzoi konsultën me homologun e tij kinez për të parashtruar edhe një herë shqetësimet rreth konfliktit Kosovë-Serbi apo taksës ndaj produkteve serbe e cila ka ndërprerë bisedimet mes tyre.
Pas takimit, Vuçiç deklaroi se ai gjeti mirëkuptimin e homologut të tij Shi Xhinping ndërsa shtoi se qëndrimet e tij do t’i ndajë ditën e nesërme edhe me presidentin rus, Vladimir Putin.
Takimet me dy liderët e fuqishëm lindorë të cilët vazhdimisht kanë mbajtur anën e Beogradit sa herë problematika Kosovë-Serbi është ngritur në Këshillin e Sigurimit të OKB-së, vjen përpara samitit që mbahet ditën e hënë në Berlin.
Edhe në këtë mbledhje të liderëve të Ballkanit është raportuar se Kosova do të jetë temë kyç e diskutimeve, por si Prishtina, edhe Beogradi janë pak optimistë për ndonjë arritje të caktuar.
Pala serbe e ka bërë të qartë se shfuqizimi i taksës maksimaliste mbetet një vijë e kuqë për vijimin e çdo negociate, ndërsa në Prishtinë kreu i qeverisë, Ramush Haradinaj, edhe një ditë më parë përsëriti se qëndrimi i tij për taksën nuk ndryshon.
