Një dramë mbijetese shpallet si filmi më i mirë në Festivalin Ballkanik. Festivali Ballkanik i Filmit dhe Kulinarisë shpalli si filmin më të mirë “Dita zë fill”, me skenar dhe regji nga Gentian Koçi.
Edicioni i tetë prezantoi për publikun mbi 70 filma artistikë, dokumentarë dhe me metrazh të shkurtër. Me çmim të parë u nderua filmi “Dita zë fill” i regjisorit Koçi, ndërsa çmimet e tjera shkuan për produksionet që përfaqësonin Bullgarinë, Slloveninë, Maqedoninë, Greqinë etj…
Për organizatorin e këtij festivali, Eno Milkani, edhe ky vit ishte një sukses, ndërsa ka ende disa sfida për t’u përmirësuar në festivalin e ardhshëm. Pjesë e festivalit edhe këtë vit ishte Mish-Mash Production, ku të rinj nga gjithë Ballkani prodhuan mini reportazhe për çështje të ndryshme sociale si dhuna ndaj fëmijëve apo edhe paqja.
Çmimi i parë ka shkuar për “Let me Hug You”, një mini reportazh i krijuar nga fëmijë nga Kosova e Serbia, të cilët përcollën kështu mesazhin e paqes dhe dashurisë. Festivali i Pogradecit nisi në vitin 2011. Ai lindi si një dëshirë mes kolegësh në radhë të parë për të njohur krijimtarinë ballkanike në fushën e kinematografisë, një shkollë më vete në traditën e filmit botëror dhe atij europian.
Të stimulojë gjithashtu bashkëpunimet mes kineastëve të Ballkanit, të cilët në kohët e sotme ndajnë afërsisht të njëjtën problematikë sociale dhe kulturore.
