Në ditën ndërkombëtare anti-korrupsion, Ministri i Drejtësisë Ulsi Manja ka reaguar nëpërmjet një mesazhi, duke bërë thirrje për bashkëpunim kundër kujtdo që tenton të abuzojë.
Për Manjën ‘Peshku’ i vogël nuk duhet lejuar të bëhet i madh, metaforë e përdorur për zyrtarët e korruptuar, por duhet frenuar që kur është cironkë.
Për Manjën ‘Peshku’ i vogël nuk duhet lejuar të bëhet i madh, metaforë e përdorur për zyrtarët e korruptuar, por duhet frenuar që kur është cironkë. Manja thekson se në këtë luftë, vendi ynë ka në krah edhe SHBA, ndërsa shton se korrupsioni ndalet vetëm nëpërmjet denoncimeve.
“Bindja ime është e palëkundur: Ata që i lidh me njëri-tjetrin korrupsioni, nuk janë atdhetarë. Mund të bërtasin sa të duan në FB, apo në stadium, të bëjnë shqiponjën, a të grinden për nacionalizma, janë hipokritë që i bëjnë dëm vendit. Lufta ndaj korrupsionit nuk ka përjashtime, nuk ka solidaritet miqësor, fisnor a partiak, ndryshe je bashkëpunëtor. Secili prej nesh ka betejën e tij, në këtë luftë të madhe për të frenuar këtë virus dhe vaksina e vetme është dashuria për vendin duke denoncuar çdo formë abuzimi. Indiferenca ndaj korrupsionit është bashkëpunëtorja më e madhe e tij. Është mbulesa ku rrinë ngrohtë ata që gërryejnë rrënjët e vendit, edhe “të tuat” miku im që po lexon, sepse pavarësisht sa i ndershëm je, në pasaportën tënde që lexon “shqiptar” ke si damkë leximi “i korruptuar”, pikërisht për shkak të raporteve që vijnë edhe indiferenca shumëvjeçare. Korrupsioni nuk është i madh, apo i vogël, nuk matet me peshë a me shifra. Është i njëjtë dhe dëmin e bën po njësoj, vetëm se do pak kohë që ai peshku i vogël të rritet e të bëhet i madh. Ndaj duhet frenuar që kur është cironkë. Le të bëhemi bashkë, në këtë luftë; Kemi një nga mbështetjet më të fuqishme SHBA-të, kemi gazetarë të përgatitur dhe të aftë, kemi të rinj që duan me zemër të shnjollosin emrin e Shqipërisë, prandaj pak guxim qytetar për të mos lejuar askënd të abuzojë, apo më mirë të guxojë të abuzojë. Kështu i shërbejmë vendit. Kështu i shërbejmë demokracisë. Kështu i shërbejmë të ardhmes”, shkruan Manja.
Në kuadër të ditës ndërkombëtare anti-korrupsion, vjen sot në Tiranë i dërguari i SHBA-së për Ballkanin Perëndimor, Gabriel Escobar. Vetëm dy ditë më parë, ambasada e SHBA-së, tha se vizita e tij është për të konfirmuar gjithashtu vendosmërinë e Shteteve të Bashkuara për të luftuar korrupsionin, pandëshkueshmërinë dhe përpjekjet për të minuar demokracinë në Ballkanin Perëndimor.
